Bimbingen Khotbah Minggu 21 Februari 2016

BIMBINGEN KHOTBAH MINGGU 21 FEBRUARI 2016

Passion III, Reminiscere : “Inget Min Perkuah AteNdu O Tuhan”

Pdt. Larena br. Sinuhadji (Nd. Reynard Tarigan)

Invocatio : “Tetaplah paguh kinitekenndu janah lawanlah imbangndu e, sabap ietehndu maka teman-temanndu si sada kiniteken i belang-belang doni enda ngenanami kiniseran bagi si inanamindu” (1 Petrus 5:9)

Ogen : Kejadin 15:1-12; 17-18 (Responsoria)

Khotbah : Pilipi 3:17-4:1 (Responsoria)

Tema : TETAP I BAS KRISTUS (Berdiri Teguh)

Pembahasen Bahan Pustaka Si Badia

Tuhan Yesus ngatakenca man ajar-ajar, “Ise atena ikut ras Aku, arus maka ipersilanghana bana, ipersanna kayu persilangna je nari ikutkenna Aku”. Ertina, Tuhan Yesus sendiri enggo mereken persinget, maka sebage pengikutNa kita akan mengalami kiniseran tapi enggo pasti Tuhan tetap nemani kita seh kedungen jaman (Mat. 28:20). E maka i jenda Petrus mpetetap ukur perpulungen si ngenanami kiniseran sebage pengikut Kristus gelah tetap paguh kinitekenna, sabab si deban pe (teman-temanndu si sada kiniteken) i belang-belang doni enda ngenanami kiniseran bagi si ialami kita.

Bahan ogenta ngerana kerna perpadanen Dibata ras Abram. Kenca peristiwa Abram mbebasken Rut ras Melkisedek masu-masu Abram, reh Tuhan man Abram arah sada pengenehenen, “Ola kami mbiar Abram. Aku ngampang-ngampangi kam, janah mbelin kal upahndu Kubereken”. Ipertanyaken Abram pasu-pasu Tuhan si mbelin e erkiteken la lit anakna, seyakaten Elieser budakna si banci ngaloken tading-tadingen bas ia nari. Tapi ipetetap Tuhan Abram, maka labo Elieser si ngaloken tading-tadingen tapi anak si ipupusna sendiri. Ibabai Tuhan Abram ndarat ras ngenehen bintang-bintang i langit. Bage me teremna si nusur Abram pepagin. Tek Abram kai si ikataken Tuhan, janah erkiteken kinitekenna e ialoken Tuhan ia selaku kalak benar. Selain si e ibereken Tuhan taneh Kanaan jadi taneh Abram ras kesusurenna. Padan Dibata enda icidahken Tuhan man Abram arah sada nipi (gelah simehantu reh man bana) asum ia tunduh. Janah guna menyakinken Abram kerna taneh perpadanen e, isuruh Tuhan Abram maba persembahen berupa sada lembu beru-beru, sada kambing beru-beru, sada biri-biri beruna janah kerinana umur telu tahun. Bage pe sada ndukur ras nderapati si nguda denga. Ibaba Abram rubia-rubia ndai man Tuhan kenca enggo ikeret duakenna itamakenna petingtang keret-keret rubia nda i bas dua baris. Tapi ndukur ras nderapati la ikeret duakenna. Bage me i bas pertunduh Abram, i je Dibata ngerana kerna nubuaten si bakal terjadi nandangi kesusuren Abram, kalak Irsael maka kesusuren Abram bakal jadi budak i negeri kalak (kurang lebih 400 thn.). Tapi tan Tuhan si erkuasa nampati bangsa Israel ras iukum Tuhan bangsa si nindas bangsa Israel.

Arah bahan khotbahta Paulus bersaksi i bas penjara nari man perpulungen si tantangna kel ipantekina e me kap Pilipi maka arus tetap berdiri teguh (tetap i bas Kristus) amin sekali mbue perbeben si ialami erkiteken kiniteken man Yesus Kristus. “Usih aku ras perdiateken kalak si enggo ngikutken usihen e” (“Ikutlah teladanku dan perhatikan mereka yang hidup sama seperti kami yang menjadi teladanmu”). Ertina, labo hanya Paulus tapi nterem kalak pengikut Kristus si deban si mengalami kiniseran erkiteken kinitekenna. Sabab melala kalak si la setia, perimbang ras kayu persilang Kristus (hidup sebagai seteru salib Kristus). Jelas nina Paulus kalak si bage perlawesna kempak ku kebenen (kebinasaan), sabab dibatana e me kap peraten kulana janah si iukurina barang doni ngenca (perkara-perkara duniawi). Arus siinget kita e me kap warga Surga kap, i ja paksa genduari pe kita sangana nimai kerehen Tuhan Yesus si peduakaliken, si engkelini kita. Janji Tuhan, maka isalihkenNa me pagi kulanta si kote dingen si ermasap-masap enda jadi bali ras kulaNa si mulia. Si e banci ilakoken Kristus sabab lit bas Ia kuasa guna ngelakokenca. E maka mindo Paulus gelah jemaat Tuhan tetap nggeluh ersada ras Kristus (“Berdirilah juga dengan teguh dalam Tuhan”).

Aplikasi

I bas Minggu Passion si peteluken mulihi ipeteguhi kinitekenta gelah tetap kita i bas Kristus amin kai pe si terjadi. Melala kasus-kasus si terjadi erkiteken jabaten maka kalak Kristen igantikenna kinitekenna, erkiteken faktor ekonomi gelah pedas bayak ras la perlu penuh perjuangen hal-hal si la ngena ate Dibata pe ilakokenna, entah korupsi, erdaya narkoba, nangko, nebu-nebu, rsd. Melala ka si beralasen, “Erkiteken sistem nge makana kami pe terpaksa korupsi”, “Erkiteken keadaan ekonomi nge makana terpaksa kita nangko entah pe erdaya narkoba”, rsd, padahal situhuna melala denga opsi si deban si sifatna positif guna mengatasisa. Si e kerina situhuna nuduhkenca kualitas iman kalak Kristen si rendah denga nandangi Dibata si mada kuasa si kuasaNa lebihen asangken kerina kuasa si lit i bas doni enda seh makana melala denga kalak Kristen si lebih senang memilih hidup serba instan tapi jelas maba kebenen subuk i bas kegeluhen si genduari bage pe si i bas kegeluhen pepagin. Kinata si bagenda tentuna perlu menjadi keprihatinen ras concern kita bersama.

Rasul-rasul Tuhan, secara khusus Petrus tetap paguh kinitekenna amina pe mbue kiniseran si ialamina. La lit si meteh uga matena rasul Petrus, tapi lit sumber si ngatakenca bahwa rasul Petrus mate sebage martir i Roma i bas tahun 64 M. Abram tetap paguh kinitekenna man Tuhan aminna lenga ibereken Tuhan anak ku tengah-tengah jabuna sue bagi si ipadenken Dibata. Paulus tetap paguh kinitekenna, aminna ia ipenjara bahkan tetap ia pembarken Kata Dibata. Secara fisik ia terpenjara tapi geluh pertendinna tetap menyala-nyala guna mberitaken berita si meriah ras ia sendiri pe tetap bersukacita i bas persadanna ras Kristus. E maka tetaplah berdiri teguh i bas Tuhan ula goyah, sebab Dibata tetap nemani ras masu-masu anak-anakNa si setia man baNa.