Bimbingen Khotbah Tahun Baru 1 Januari 2016

BIMBINGEN KHOTBAH TAHUN BARU 1 JANUARI 2016

Pdt. Larena br. Sinuhadji (Nd. Reynard Tarigan)

Invocatio : “Kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu erkiteken persadanndu ras Kristus Yesus” (Pilipi 4:7)

Ogen : Masmur 8:2-10 (Responsoria)

Khotbah : Epesus 3:20-21

Tema : PERBAHANEN TUHAN, LEBIH ASA PEMINDON RAS PERUKURENTA

Penjelasen Bahan Pustaka Si Badia

Bahan khotbahta ngerana kerna pertoton Paulus man perpulungen Epesus gelah nggejapen ras ngangkai uga kekelengen Tuhan si la ersibar. Paulus ersura-sura gelah secara pribadi ngasup perpulugen e nggejapken uga belangna, gedangna, ganjangna ras bagesna kekeleng Tuhan e. Janah perbahanen Tuhan e maun la terukuri kita. Ndauh beliden asangken ngasup kita ngukurisa alu kuasaNa si sangana erdahin i bas kita. Si la siakap ngasup kita ngalakenca, kepeken ibereken Tuhan ka kengasupen man banta. Enda terbukti i bas kegeluhen Paulus sendiri secara pribadi, i ja i bas penjara nari pe tetap denga ia ngasup ermeriah ukur, bahkan iberekenna surat-surat penggembalaan guna mpegegehi perpulungen. Si e kerina igejapken Paulus erkiteken kekelengen Tuhan si la ersibar si tetap masu-masu kegeluhenna.

I bas pengogen si pemena, icidahken Pemasmur kerna kemulian Tuhan arah tinepana manusia, i ja tuhu-tuhu meherga kel manusaia ibahan Dibata. Ibahan Tuhan manusia teruhen asangken Tuhan ngenca, iberekenNa kemulian ras kehamaten. Ibereken Tuhan kuasa guna merentah kerina rubia-rubia.

Aplikasi

Mulihi i bas wari si pemena tahun si mbaru enda, radu ras kita ngataken bujur man Tuhan, sabab pasu-pasuNa si simpar i bas kegeluhenta, kecukupen daging kula ras pertendin. Kesehaten, cukup guna nakan ras pangan si tep-tep wari, rukur ras erbahan si mehuli man kalak, gegeh ngalaken erbage-bage perbeben, keriahen ukur i bas melayani ras melala denga si deban si ibahan Tuhan i bas kegeluhenta. E maka i bas kita ndalani tahun si mbaru enda pe, gejapkenlah maka Dibata si setia si enggo nemani ras masu-masu kita i bas tahun 2015, Dibata ka si tetap setia nehken keleng ateNa man banta i bas tahun si mbaru enda.