Bimbingen Khotbah Malam Natal 24 Desember 2015

BIMBINGEN KHOTBAH MALAM NATAL

24 DESEMBER 2015

Pdt. Larena br. Sinuhadji (Nd. Reynard Tarigan)

Invocatio : “Sabap enggo ipetangkas Dibata lias ateNa guna keselamaten kerina manusia. Lias ateNa e ngajari kita nadingken kegeluhen si la ngena Dibata ras sura-sura doni, gelah nggeluh kita ngkuasai dirinta, bujur dingen sisembah Dibata alu kegeluhenta i doni enda” (Titus 2:11-12)

Ogen : Masmur 89:16-27

Khotbah : Perbahanen Rasul-rasul 13:16-26

Tema : KESELAMATEN E ENGGO REH

Penjelasen Bahan Pustaka Si Badia

Bahan khotbahta ngerana kerna sejarah keselamaten manusia si enggo ndabuh ku bas dosa, si enggo irancang Dibata erkelangken kalak Israel, bangsa pilihen Dibata. Paksa si e, Paulus ras Barnabas i bas perdalanen missina seh ku Antiokia (Ps. 11:26, “i Antiokia me tantangna ajar-ajar e igelari Kristen”). Lit kesempaten ibereken man Paulus guna nehken Berita si Meriah i Rumah Pertoton paksa si e. Labo hanya man kalak Israel tapi pe termasuk man kalak si nembah man Dibata ilumbaken Paulus Berita si Meriah e. Ibenaken i bas bangsa Israel sebage bangsa pilihen Dibata janah bangsa si tandang i Mesir selama kurang lebih 400 tahun. Kenca si e ibebasken Tuhan i bas perdalanen padang gurun selama 40 tahun maka seh ku Taneh Perpadanen. Kenca enggo i taneh Kanaan, bangsa e iperentah hakim-hakim seh ku bas pemerentahen raja rikutken pemindon bangsa e sendiri, e me kap ibenaken raja Saul. Erkiteken la taat man Tuhan, igantiken raja Daud. Janah i bas kesusuren Daud me ipekeke Dibata si ngkelini Israel, e me Yesus Kristus bagi si enggo ipadanken Dibata ndube.

Kenca si e ijelasken Paulus kerna Yohanes Peridin si erdahin guna mbuka dalen man Yesus Kristus gelah mpersiapken pusuh ras perukuren manusia paksa si e gelah siap i bas ngalo-ngalo Mesias. Ipersiapken Yohanes gelah manusia jera ras iperidiken. Yohanes la mengambil keduduken, kemuliaan si hanya guna Yesus Kristus. Sabab lit deba kalak “ngerentes dalan” guna sesekalak jelma si bakal ipetandaken sebage pemimpin, janah kedungenna, lebih terkenal, tersohor si ngerentes dalan e. Tapi i jenda Yohanes la ia muat keuntungen guna dirina jine. Bahkan tuhu-tuhu ipeterukna kel dirina, nina, “Labo aku si itimaindu e, tapi Ia si reh arah pudingku”. Jadi juak-juakNa pe la akapna ia metunggung. Tegas Paulus ngatakenca, maka  “O senina-senina, subuk kam kesusuren Abraham, bage pe kalak si deban si nembah man Dibata: man banta me berita keselamaten enda”. Janah adi siterusken perikop enda, enggo reh teremna kalak si tek man Tuhan, perban si e, maka cian ate kalak Jahudi ras ipelawesna Paulus. Bage me siidah, berita keselamaten i bas Yesus Kristus lit deba kalak ngalokenca, janah lit ka menolak, khususna kalak Jahudi maka berita keselamaten enggo semakin terbuka man kerina bangsa, “Tapi ngaloi Paulus ras Barnabas alu la biar-biaren nina, “Tuhu maka arus man bandu lebe Kata Dibata ipeseh. Tapi perbahan itulakndu, janah iakapndu maka la kam metunggung ngaloken kegeluhen si tuhu-tuhu si rasa lalap, e maka lawes kami ku bangsa-bangsa si deban” (ay. 46).

I bas pengogen si pemana icidahken Pemasmur kerna kesangapen man kalak si nembah man Dibata. Dibata si itandai Pemasmur Dibata si tetap ngkawali umatNa, Dibata si permenang.

Aplikasi

Keselamaten i bas Yesus Kristus si enggo iberekenNa man banta, iberekenNa alu cuma-cuma, labo erkiteken beluhta, tapi anugerah Tuhan semata. Ef. 2:8, “Sabap erkiteken lias ate Dibata nge maka kam enggo terkelin, erkiteken tek kam man Kristus. Labo bekas perbahanenndu, tapi pemere Dibata kap e”. Biasana, si cuma-cuma, si gratis kurang kita ngergaisa. Tapi kebenaren Firman Tuhan ngajari kita, kalak si enggo iselamatkenTuhan, tetap nggeluh i bas keselamaten, sabab dosa la nari erkuasa i bas dirina. Invocatio jelas ngatakenca, “Sabap enggo ipetangkas Dibata lias ateNa guna keselamaten kerina manusia. Lias ateNa e ngajari kita nadingken kegeluhen si la ngena Dibata ras sura-sura doni, gelah nggeluh kita ngkuasai dirinta, bujur dingen sisembah Dibata alu kegeluhenta i doni enda" (Titus 2:11-12). Dosa ® Iman ® Selamat ® Taat/Berbuat Baik.

Kalak si erdosa, ia banci terkelin erkiteken kinitekenna (sola fide) ras si e kasih karunia Tuhan (sola gratia), labo erkiteken perbahenna si mehuli. Tapi adi kalak si enggo iselamatken, i bas kegeluhenna la idalankenna si mehuli si ngena ate Dibata, la ia taat man Tuhan, berarti la ia tek man keleng ate Tuhan si enggo nelamatken ia. Lias ate Tuhan ngajari kita, nadingken si la ngena ate Dibata ras sura-sura doni. E maka i bas si e tetap kita erpengendes man Tuhan katawari paksa pe.

Gus Dur pernah mengatakan, “Mestinya yang merayakan hari Natal bukan hanya umat Kristen saja, melainkan juga umat Islam dan umat beragama lain, bahkan seluruh umat manusia. Sebab Yesus Kristus, atau Isa Al-Masih adalah Juruselamat seluruh umat manusia, bukan Juruselamat umat Kristen saja”. Ertina, arah pengakun selakak Gus Dur si labo kalak Kristen, tek ia maka Yesus Juruselamat, tapi enterem denga kalak Kristen sendiri si ndarami ras tek man keselamaten di luar Yesus. I bas erbage-bage perbeben si reh (sakit penyakit, ekonomi si sulit, rumah tangga si rayung) lit denga kalak Kristen si mindo jalan keluar man kuasa si deban i luar kuasa Yesus. I bas lit sura-sura guna ertambah-tambah kesuksesan, kebayaken, naik jabaten, mindo penampat man kuasa si deban. Rikutken Firman Tuhan i bas malam Natal enda tetaplah siandalken Yesus Krisus sebage Tuhan ras Juruselamta i bas kerina dampar geluhta. Janah secara khusus i bas Natal Diakoni enda pe kita tetap ipake Tuhan guna jadi penolong man kalak si deban. Tetap kehadirenta jadi pasu-pasu (berkat) man kalak si deban, secara khusus man senina turangta si lit i bas erbage-bage perbeben, kiniseran gelah tetap igejapina keselamaten Tuhan si nampati arah kehadirenta.