Bimbingen Khotbah Minggu 13 Desember 2015

BIMBINGEN KHOTBAH MINGGU 13 DESEMBER 2015

Minggu Advent III

Pdt. Larena br. Sinuhadji (Nd. Reynard Tarigan)

Invocatio :

“Bagi nina Dibata, “Nggeluh me Aku ras ia janah ringan Aku i tengah-tengahna. Aku me jadi Dibatana janah ia jadi bangsangKu” (2 Korinti 6:16b)

Ogen :

Lukas 3:7-18 (Tunggal)

Khotbah :

Jesaya 12:2-6 (Responsoria)

Tema :

DIBATA I TENGAH-TENGAHTA

Penjelasen Bahan Pustaka si Badia

Judul ibas i bas bahan khotbahta e me “Ende-enden Pengataken Bujur” (Nyanyian Syukur atas keselamatan). Ende-enden pengataken bujur umat Tuhan erkiteken enggo surut rawa Tuhan, Tuhan la nari ernembeh ate. Enggo ipulahi Tuhan bangsaNa i bas kiniseranna nari. Perpulungen ngenanami kiniseran erkiteken kesalahen si ibahanna sendiri. Kiniseran umat igambarken desken kalak si muas. Tapi i jenda enggo ipuasken Tuhan bangsaNa, desken lau malem si mereken keriahen man kalak si muas.

Erkiteken perbahanen Tuhan, maka umat ngataken bujur man Tuhan. Ras tugas umat guna ermomo, meritaken man bangsa-bangsa kerna perbahanen Tuhan si luar biasa, si tetap ngkelengi umatNa. Respon si deban si arus ilakoken umat e me kap ersurak ras rende muji Tuhan.

Khotbah Johanes Peridiken i daerah aliren Lau Jordan, gelah jelma si nterem jera i bas dosa-dosa nari. Tandana jera, arus iperidiken gelah dosa-dosa ialemi Dibata. Enterem jelma si merespon. Tapi kritik Tuhan Jesus, sabab lit pengakap kalak Israel enggo pasti selamat erkiteken ia kesusuren Abraham. I bas pengakapna ia banci pulah i bas ukumen nari erkiteken ia kesusuren Abraham. Si ipindoken i jenda cidahkenlah arah perbahanen tandana enggo jera. Jera arus iumputi alu hal-hal kongkrit si mehuli, si ngena ate Dibata.

Kai si ikhotbahken Johanes datken respon i bas si megi-megi. Si pemena lebe kalak si nterem. Kai si arus ibahan kami? Si pemena lebe isentuh i bas pemberitaan Johanes e me kap soal kekelengen. Ise dua bajuna, bereken man si la lit bajuna. Berbagi man kalak si la lit bas ia. Janah lit dua profesi si isinggung kitab Lukas i jenda e me kap pengalo cuke ras tentera, si umumna mbue i je godaan i bas ndalanken profesina alu mehuli. Pengalo cuke la isenangi rayat erkiteken pindona pajak man rayat buen asa si enggo itentuken. Janah ia bekerjasama ras Roma si naban bangsa Israel. Sedangken tentera e me kap si bertugas pengayom rayat. Tapi si usur ialakonna memeras sen rayat sebagai ganti “pengamanan” si enggo iberekenna.

Kepeken penjelasen Johanes erbahanca kalak si nterem erpengakap maka Johanes e Mesias si sangana itimai kerehenNa. Tapi Johanes alu ukur si meteruk mereken penjelasen, labo ka i je ia muat kesempaten guna mengaku diri “Mesias”. Johanes hanya pelopor, si ngerentes dalan man Jesus Kristus, Mesias. Ngosari tinali sepatuna pe labo akapna metunggung. Ndiru enggo sikap i bas tan Tuhan guna miari. Page si perngis itamaken bas lumbung, si lapung-lapungna i tutung i bas api si la ernipet-nipet. Alu erbage-bage pengajaren i beritaken Johanes Berita si Mehuli i bas Dibata nari man jelma si nterem.

Aplikasi

Mulihi i bas Minggu Advent si peteluken enda Tuhan mpersingeti kita kerna kekelengenNa si la ergadi-ngadi iberekenNa i bas kegeluhenta. Kekelengen Tuhan arus irespon alu kita ngataken bujur man Tuhan ras rende ersurak man baNa. Ngataken bujur man Tuhan murah guna ibelasken tapi sulit guna iprakteken, perbahan kai si ibelasken kita arus teridah i bas perukuren ras perbahanenta i bas kerina dampar geluhta. Subuk meriah ukur entah ceda ate, sehat entah sakit bage pe tupung mbue perbeben si man hadapen. Kinatana, mbuen denga kita ngasup ngataken bujur i bas situasi ras kondisi si bagi ukurta.

Je nari tetap nggeluh bagi si ngena ate Tuhan. Banci jadi erbage-bage tantangen i bas kegeluhenta, pendahinta erbahanca kita ndalanken si la mehuli. Nggeluh i bas pertobaten berarti berbalik i bas si la mehuli ras ndalanken si mehuli si ngena ate Dibata. Labo kita ituntut guna nandingken pendahin entah jabaten si dem alu godaan, tapi Tuhan alu kuasa KesahNa si Badia mereken gegeh man banta guna ngasup kita ndalanken tanggung jawabta alu mehuli, malang man Tuhan. Dingen arus siinget sada paksa waktu ukumen ibereken Tuhan man kalak si la ncidahken kinitekenna arah buah pertobatenna. Banci jadi i bas wari-wari si enggo sidalanken kita lit hal-hal si menyimpang i bas dalan Tuhan. Firman Tuhan, nasehat arah kalak si deban ngingetken kita guna nadingken kesalahen e, guna memotivasi kita nggeluh terulin asa si enggona. Perlu kita erlajar arah si megi-megi khotbah Johanes peridiken, minter iresponna perkataan Johanes. Berbeda ras Herodes bage pe Herodias, erkiteken merasa tersinggung arah kai si ikataken Johanes, malah akhirna Johanes itamakenna ku bas penjara (ay. 19-20).