Bimbingen Khotbah Natal 25 Desember 2015

BIMBINGEN KHOTBAH NATAL 25 DESEMBER 2015

Pdt. Larena br. Sinuhadji (Nd. Reynard Tarigan)

Invocatio : “Jakup e me Jusup; Jusup e me perbulangen Maria. Arah Maria me tubuh Yesus si igelari Mesias si ipadanken Dibata” (Matius 1:16)

Ogen : Jesaya 1:1-6

Khotbah : Lukas 2:1-14

Tema : YESUS ENGGO TUBUH MAN GUNANTA

Penjelasen Bahan Pustaka Si Badia

Bahanta sekali enda setiap tahun rusur sioge ras sikhotbahken kita. I ja sejarah dunia ipake Dibata guna nehken sura-suraNa. Erkiteken lit perentah i bas Kaisar Agustus nari guna sensus penduduk, e maka kerina kalak berkat ku kuta pengulihenna gelah isensus. Kaisar Agustus e me kaisar si paling erkuasa tupung Yesus tubuh. Gelar aslina, Gaius Julius Caesar Octavianus (diangkat jadi kaisar karena kakeknya Julius Caesar tewas dalam pembunuhan di Roma Tgl. 15 Maret tahun 44 s.M). Sejarah mencatat maka ia sebage kaisar Roma si terbesar ras berprestasi besar. I bas jamanna tercipta administrasi pemerintahan tertib hukum, memecat pejabat si korup, membangun perekonomian, membangun jaringan jalan raya. Erkiteken prestasina senat mereken gelar Agustus (dari kata “augere” ertina pelipatgandaan, penambah kemakmuran). Janah masa pemerentahenna ka ilakoken sensus penduduk dalam rangka menata masalah kependuduken (Bhs. Ind. : “Pada waktu itu Kaisar Agustus mengeluarkan suatu perintah, menyuruh mendaftarkan semua orang di seluruh dunia” e me di seluruh kekaisaran Romawi). Ertina, kaisar Agustus ipake jadi alat rencana Dibata guna merealisasiken nubuat i bas Mikha 5:1.

Jusuf ras tunangenna Maria pe berkat i kuta Nasaret nari ku kuta Betlehem, kuta ketubuhen raja Daud, sabab Jusuf kesusuren Daud. Kenca seh i Betlehem, seh me paksana Maria guna mupus, erkiteken la lit nari ingan i bas rumah penginapen e maka ipupusna anakna sintua dilaki i karang asuh-asuhen, ibalutina alu ampan janah ipepedemna i bas pelangkah. Berita ketubuhen Yesus pertama kali iberitaken malekat Tuhan man permakan si sangana ngiani asuh-asuhen i mbal-mbal. Tapi nina malekat man bana, “Ola mbiar: Aku reh maba Berita si Meriah, si mereken keriahen si mbelin man kerina manusia. Sendah i Kuta Daud enggo tubuh Juruselamat man bandu, e me Kristus Tuhan”. Berita kerna ketubuhen Yesus si ibaba malekat tuhu-tuhu mereken keriahen si mbelin (labo keriahen si kitik), sebab Yesus Kristus Juruselamat man kerina manusia, la erdobahen, kerina manusia si tek man baNa dingen ngaloken Ia sebage juruselamat. Malekat-malekat pe ikut rende muji-muji Dibata i bas ketubuhen Juruselamat manusia.

Aplikasi

Labo sada kebetulan, sejarah dunia ikut mencatat peristiwa ketubuhen Yesus asum keluarga Jusuf berkat ku Betlehem guna sensus penduduk, ras kedungenna Maria melahirkan i Betlehem sue bagi nubuat nabi Mikha. Ipake Tuhan kaisar Agustus guna nehi sura-sura Dibata. Ertina, ise pe banci ipake Dibata guna nehi sura-sura Dibata. Siingeat peristiwa Jusuf si jadi kalak nomor 2 i Mesir, ipake Dibata Potifar ras Firaun i bas peristiwa e. Siinget ka pembebasen bangsa Israel i bas Babel ras kedungenna mulih ku Jerusalem, ipake Dibata raja Persia i bas pembebasen e. Ise pe banci ipake Dibata guna nehi sura-suraNa.

Pelangkah (palungan) ncidahken perban la lit nari ingan guna Yesus tubuh. Erkiteken la lit nari ingan bas rumah penginapen, maka akhirna Maria mupus i karang asuh-asuhen. Pelangkah sebage tanda solidaritas Yesus man kalak si la lit inganna (idiskriminasi bas masyarakat). Ras memang sepajang pelayanen Yesus, Ia solider man enterem kalak si la lit inganna bas masyarakat: erkiteken diskriminasi sosial (pengalo cuke, PSK, rsd.), erkiteken kesuliten ekonomi (permakan, penjala nurung, rsd.), erkiteken keterbatasen fisik (kalak si pangpangen, tunanetra, kusta, rsd.), erkiteken faktor suku bangsa (kalak Samaria). Yesus hadir ras solider man kerina manusia, ras kekelengenNa teridah nyata. Sebage pengikut Yesus mari tetap siusih Yesus Kristus (Imitatio Christi), kehadirenta maba sukucita, kemalemen ate man kerina manusia alu la erdobahen.

I bas wari ketubuhen Yesus Kristus (Natal), la lit ingan man Tuhan Yesus seh makana Ia tubuh i karang asuh-asuhen. Ola min sempat e terjadi i bas kegeluhenta, kita si enggo ngaloken kekelengenNa, tapi la lit ingan man Tuhan Yesus bas pusuh ras ukurta, sabab pusuh ukurta enggo idemi alu erbage-bage hal si la mehuli: keegoisan, kiniganjengen ukur, elem-elem, keserakahan, kebencian, rsd. Bahanlah Tuhan Yesus erkuasa, berotoritas, i bas kegeluhenta alu tetap sijaga pusuh ukurta bersih.

Berita Sukacita si mbelin enggo ibaba malekat Tuhan man permakan-permakan. Kinitekenta ras pengendesenta man Yesus nampati kita guna tetap bersukacita ibas kerina dampar geluhta, subuk la bagi ukurta. Masalah boleh ada, tapi jangan pernah membuat kita lesu ras lemah. Kalak si mbiar, lemah, jungut-jungut, numpahi padan e me kalak si la tek nandangi kuasa Tuhan si luar biasa. Yesus Kristus, Ia me Penampatta si meganjangna, Dibata si mada kuasa, Bapa si rasa lalap, Raja Dame (Ogen). Masalah ada guna tetap kita mengandalken Tuhan ras naik level i bas kinitekenta. Keriahen si mbelin enggo ibereken Dibata man banta. Tetaplah kita ermeriah ukur ras ngataken bujur man Dibata. Ras kehadirenta pe maba keriahen ukur man kalak si deban i sekelewetta, subuk arah totonta, kata-kata motivasi, kehadirenta, solusi rsd. Selamat wari Natal, Immanuel!