Bimbingen Khotbah Minggu 6 Desember 2015

BIMBINGEN KHOTBAH MINGGU 6 DESEMBER 2015

Minggu Advent II

Pdt. Larena br. Sinuhadji (Nd. Reynard Tarigan)

Invocatio :

“Jesus Kristus me si maba kita bengket ku bas lias ate Dibata erkiteken kinitekenta. Janah i bas lias ate Dibata e me kita nggeluh dingen ringan. Dage meriah ukurta sabap lit pengarapenta maka kita ikut dat bagin i bas kemulian Dibata” (Roma 5:2)

Ogen :

Maleakhi 3:1-4 (Tunggal)

Khotbah :

Pilipi 1:3-11

Tema :

NGENANAMI LIAS ATE DIBATA

PENJELASEN BAHAN PUSTAKA SI BADIA

Paulus nulisken suratna man perpulungen Pilipi i bas penjara nari. Tapi i bas perikop enda banci siidah, labo bahasa kecedan ate, kesedihen, tapi bahasa sukacita, pujian rikut motivasi si itulisken Paulus dalam ranga mpeteguhi kiniteken perpulungen. Piga-piga hal si banci siidah i bas perikop enda e me :

• I bas penderitaanna, Paulus tetap denga mampu mperdiateken kalak si deban si membutuhken penampat (pertolongan). Secara khusus i jenda Paulus tetap ertoto man perpupulungen Pilipi. Pertoton si niangkatkenna alu meriah ukur. Erkiteken sedekah enda kehadiren perpulungen tuhu-tuhu nampati Paulus i bas nehken Berita si Meriah. Kekelengen, penampat, si icidahken perpulungen alu la ermedu-medu tantangna nari seh genduari (ay. 5).
• Paulus ras perpulungen radu ras enggo nggejapken lias ate Dibata. Lias ate Dibata si tetap banci igejapken Paulus tupung ia bebas denga mbarenda i bas mpertahanken ras mpeteguhi Berita si Meriah, bage pe i bas paksa ia ipenjara.
• Paulus tetap ertoto man Tuhan gelah itambahi Tuhan keleng ate rikut ras pemeteh si tuhu-tuhu ras pengangkan si serta gelah perpulungen tetap paguh i bas erkiniteken man Tuhan. Alu bage lit pe erbage-bage tantangen (pengajaren si papak), tetap alu bijaksana ipilihna si mehuli si ngena ate Dibata. Alu bage, perpulungen tetap banci njagai kinitekenna alu bersih seh i bas Kristus reh peduakaliken guna ngadili kerina manusia.

I bas bahan ogen, nabi Maleakhi mpersingeti kerna kejahaten si ilakoken imam-imam ras bangsa Israel i ja pergeluhna la sue ras pengajarenna bage pe mekarus i bas ia nehken persembahen man Tuhan. Maleakhi ngajuk kalak Israel gelah mulihi mpekena ketutusenna ras mulihken ku Dibata, sabab wari Tuhan, wari ukumen e reh me. I bas kerehen Tuhan ipebali ras sabun cuci si keras bage pe api si ipake tukang ngelebur besi, pirak ras emas. Proses pembersihen ras pemurnian si igambarken Maleakhi tuhu-tuhu mesui ras mesera. Tapi adi nggit iproses, imurniken, tentu bangsa e jadi bersih dingen ngena ate Dibata.

APLIKASI

La lit ise pe ras kai pe si banci nirangken kita ras keleng ate si icidahken Yesus Krsitus, subuk kegeluhen entah pe kematen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bage pe si jadi pagin (bdk. Roma 8:38). Lias ate Tuhan Jesus Kristus si tetap iberekenNa banta, nai-nai nari, genduari seh rasa lalap.

I bas bahan khotbahta, Paulus tuhu-tuhu banci tetap nggejapken lias ate Tuhan, subuk sanganna bebas denga ia guna meritaken Kata Dibata. Gejapina kel maka ipetunggungken Tuhan ia jadi serayanNa. Bage pe kenca enggo ipenjara i je pe tetap denga igejapina lias ate Tuhan arah perhatian ras penampat arah perpulungen nari si tetap mperdiateken Paulus. I bas bahan ogen, i ja i bas kesalahen imam-imam ras bangsa Israel, la ngena ate Tuhan bangsaNa mate i bas dosa. I persingeti Tuhan arah kerehen Tuhan si memurniken bangsaNa alu gambaren sabun cuci si keras ras api si ipake tukang guna ngelebur besi, emas entah pirak. Kalak si nggit patuh guna imurniken, iproses nge seh geluhna bersih seh kerehen Tuhan peduakaliken.

Banci jadi erbage-bage hal si ialami kita desken kegeluhen si alami Paulus bage pe imam-imam. Sakit penyakit, situasi ekonomi si la menentu, bencana si ngkenai kita, kebenen. Tuhan la pernah nadingken kita. Lias ateNa tetap iberekenNa, arah pergegeh, pengapul, megeggeng, teman-teman si mperdiateken. Si e kerina merupaken proses guna Dibata tetap memurniken kita, gelah tetap kita ngerembaken diri ras Ia.

Minggu Advent si peduaken, mulih mpersingeti kita, maka lias ate Dibata tetap nemani geluhta. Gejapkenlah, penanam-nanamlah keleng ateNa. Sipersiapken pusuhta guna ngalo-ngalo kerehenNa, subuk i bas Perayaan Natal bage pe kerehenNa peduakaliken alu tetap geluh alu bagi si ngena ateNa. Termasuk i bas perbeben sekali pe si nderpa ngasup denga kita nehken kekelengen, memotivasi, nampati kalak si deban. Minggu-minggu Advent ras Natal-natal sirayaken kita, lebih sitingkatken i bas kita nehken kekelengen, sabab enggo leben sigejapken lias ateNa masu-masu geluhta.