Bimbingen Khotbah Minggu 3 Januari 2016

BIMBINGEN KHOTBAH MINGGU 3 JANUARI 2016

MINGGU EPHIPANIAS I

Pdt. Larena br. Sinuhadji (Nd. Reynard Tarigan)

Invocatio : “Nina Maria, “tendingku muji Tuhan, meriah ukurku perban Dibata penebusku” (Lukas 1:46-47)

Ogen : Epesus 1:3-14 (Tunggal)

Khotbah : Jeremia 31:7-14 (Tunggal)

Tema : DIBATA MABA KESELAMATEN, PUJILAH IA

Penjelasen Bahan Pustaka Si Badia

Bahan khotbah nuriken kerna pengarapen kenca ukumen, maka Dibata sendiri nelamatken umatNa erkelangken raja Persia, i ja paksa si e Israel itaban Babel. I bas tahun 539 SM, kerajan Babil italuken Persia. Kores raja Persia mpediat kalak Israel mulih ku negerina jine. Dibata sendiri si naruhken bangsaNa mulih ku Jerusalem. Keselamaten si ibahan Dibata teridah i bas ay. 8, i ja Dibata sendiri si mpepulung umatNa si enggo iambekken ndai. Kalak si cempang ras pentang ncidahken kinilatunggungen bangsa enda ngaloken perkuah ate Dibata. Pentang, cempang, bage pe diberu si nandangi mupus ngambarken kelemahen secara fisik dingen la banci erdalan i bas perdalanen si ndauh. Termasuk i se pe ialo-alo Dibata guna bengket ku bas perkuah ateNa, i se pe la erdobahen. Janah enda jadi erkiteken perbahanen Tuhan semata (ay. 11, “Enggo Kutebusi bangsa Israel i bas bangsa si gegehen asangken ia”). E maka i bas ay. 12-13 respon keriahen ukur i bas bangsa e enggo ndatken perkuah ate Tuhan. Rende ersurak i deleng Sion (ay. 12a), janah kerina lapisen (si nguda-nguda, anak perana, dilaki, diberu) ngaloken perkuah ate Dibata. Janah isalihken Tuhan kepiceten jadi keriahen.

Bahan ogen, ilumbaken Paulus man perpulungen Epesus gelah muji Tuhan i bas Yesus Kristus erkiteken perkuah ras keleng ateNa si enggo ibereken Tuhan banta. I ja tantangna kita ikuasi dosa, budak Iblis, tapi erkiteken Kristus enggo kita itebusi, dosa-dosanta enggo ialemi Dibata. Asum kita tek nandangi kai si enggo ibahan Dibata maka iberekenNa cap i bas kita tandana kita sikerajangen Tuhan, e me kap Kesah si Badia. Dingen Kesah e si nampati kita i bas ndungi dahin si enggo ibenaken Dibata i bas nelamatken kita. Ertina, katawari paksa pe tetap kita ernalem man Dibata gelah Kesah si Badia tetap ngarak-ngarak kekegeluhenta.

Aplikasi

Teluna bahan i bas minggu pemena tahun si mbaru ncidahken banta maka Tuhan enggo mereken keselamaten man banta. Maria enggo iselamatken Tuhan. Tuhu-tuhu meriah ukurna sabab Tuhan Penebusna. Maria iselamatken Dibata i bas perasaan mela, tertekan ku bas perasaan meriah ukur. Rasul Paulus mpetangkas uga Yesus Krstus nggenepi keselamaten si enggo irencanaken Dibata man doni enda. Janah bangsa Israel pe enggo iselamatken Dibata i bas kiniseran pembuangen nari.

Keselamaten enggo ialoken kita i bas Yesus Kristus. Janah kai si enggo ibahan Tuhan banta tuhu-tuhu mereken kemalemen ate banta erkiteken la nari kita budak dosa. Perbahanen Tuhan ya dan amin, la nari mudah-mudahan. Alu bage respon kalak si enggo iselamatken Tuhan katawari paksa pe ipujina Dibata arah kerina pengkebet geluhna.