Bimbingen PJJ Tgl. 8 - 14 November 2015

BIMBINGEN PJJ TGL. 8 - 14 NOVEMBER 2015

Pdt. Larena br. Sinuhadji (Nd. Rey Tarigan)

Ogen :

Heber 13:4

Tema :

NGERGAKEN PERJABUN

Tujun :

Gelah ngawan ni perpulungen :

1) Ngangkai maka jabu e bekas panteken Dibata

2) Ngasup ngergai ras njagai kebadian perjabun (keluarga)

Penjelasen Bahan Pustaka Si Badia

Heber 13, bagin terakhir i bas kitab enda, ngerana kerna hal-hal praktis si iarapken penulis banci ilakoken kalak Kristen paksa si e. Secara khusus si jadi nats-ta ngerana kerna hubungen i bas jabu, i ja perbulangen ras ndehara tetap arus ngergai perjabun e dingen kegeluhen perbulangen ras ndehara i bas perjabun la banci melket. “Kerinalah kam ngergaken perjabun”, ertina ibenai i bas perbulangen ras ndehara arus ngehamati rumah tanggana, bage pe rumah tangga kalak si deban. Adi bas bimbingenta, la banci ngerontangi jabuna bage pe jabu kalak si deban. Termasuk orang ketiga: wanita idaman lain (wil), pria idaman lain (pil), entah pe orang tua, entah pe metua, la banci erbahanca rontang perjabun kalak.

Ras kegeluhen i bas jabu arus ijaga kebadianna. Adi bas nats-ta jelas ikatakenna, erlagu la mehuli entah pe si erlua-lua (mencemarkan tempat tidur, karena orang-orang sundal dan pezinah akan dihakimi oleh Allah). Hal enda tegas ilumbaken man kalak Kristen paksa si e, erkiteken enggo lit bas perpulungen si ndabuh ku bas perjinahen (perselingkuhen), si la arusna ilakoken kalak Kristen. Janah konsekuensi man kalak si la erlagu la mehuli (erlua-lua) iukum Dibata pepagin.

Aplikasi

Labo hanya i bas jaman i ja surat man kalak Heber enda ibereken terjadi degradasi moral, tapi i bas paksa gundari pe banci ikataken reh meningkatna. Melala keluarga-keluarga si la nari terpertahankenna jabuna seh makana sirang, erkiteken litna orang ketiga, kekerasen i tengah-tengah jabu (pisik, psikis, kekerasen ekonomi, kekerasen seksual, rsd.). Situhuna, akar i bas erbage-bage persoalen i tengah jabu banci terjadi, khususna perselingkuhen erkiteken kinilapatuhen man Tuhan Dibata. Tapi adi i bas setiap pribadi (perbulangen ras ndehara) nginget kerna Tuhan si enggo mpersadaken ia duana (Kej. 2:18), ras padan perjabunna, maka tetap ia ngaloken pasangenna i bas erbage-bage keadaan ras tetap banci ijagana kebadian perjabunna seh Dibata nirangkenca alu kematen. Padan perjabun si labo hanya mengikat ia ras pasangenna tapi termasuk perpadanen ras Tuhan si enggo mpersadaken jabu e. Ertina, kepatuhen man Dibata si enggo mpersadaken kita si mendorong kita guna tetap banci njagai kebadian jabunta, walaupe situhuna lit erbage-bage kesempaten, godaan, fasilitas si mendukung guna kita la njagai kebadian jabu e. Kepatuhenta man Dibata mabai kita ngasup ngkuasai dirinta.

La njagai kebadian perjabun labo hanya persoalen perselingkuhen tapi pe termasuk la mediate entah la ertanggung jawab nandangi kebutuhen jabuna, bersikap kasar, terjadi penindasan, konflik terus-menerus, ras melala denga si deban si erbahanca keluarga e la nggeluh i bas kehamonisen.

E maka penting kel, peran gereja guna mabai jemaat tetap nggeluh setia i bas jabuna masing-masing gelah alu bage jabu e jadi pasu-pasu man isi doni enda. Erbage-bage kegiaten banci ilakoken: seminar kerna keluarga, retreat pasutri, nonton bareng, games-games entah pe permainan keluarga i bas moment pekan kebaktian keluarga umpamana. Mari sibaba tetap keluarganta, jadi keluarga si jadi usihen ras pasu-pasu man kalak si deban.