Bimbingen PJJ Tgl. 1 - 7 November 2015

BIMBINGEN PJJ TGL. 1 - 7 NOVEMBER 2015

Pdt. Larena br. Sinuhadji (Nd. Rey Tarigan)

Ogen :

Pilipi 2:1-5

Tema :

MEDIATE NANDANGI UNIT PELAYANEN DIAKONIA GBKP

Tujun :

Gelah ngawan ni perpulungen :

1) Meteh unit pelayanen Diakonia si lit i bas GBKP

2) Mediate ras ikut muat bagin i bas unit pelayanen Diakonia GBKP

Penjelasen Bahan Pustaka Si Badia

Surat Paulus man perpulungen Pilipi itulisken Paulus i bas penjara nari dalam rangka pengataken bujur Paulus erkiteken perhatian si sedekah enda enggo ibereken perpulungen dalam rangka penginjilan Paulus, terlebih tupung Paulus ngenanami kiniseran (Ps. 1:5). Si e kerina banci ilakoken erkiteken kiniersadan arihna i bas perpulungen terlebih kerembakenna ras Tuhan. E maka i jenda Paulus mpersingeti gelah tetap ijaga geluh kiniersadan e. Piga-piga hal i jenda si ilumbaken Paulus maka tetap banci paguh kiniersadan i bas perpulungen, e me :

1. Geluh tetap rembak ras Kristus. Kegeluhen si tetap erkemalangen man Krisus erbahanca megegeh i bas ngalaken erbage-bage tantangen. Keleng ate Dibata ras KesahNa si Badia si tetap ngapuli perpulungen i bas erbage-bage kesusahen si nderpa.
2. Gelah tetap nggeluh ersada arih, ersada ukur, sikeleng-kelengen dingen ersada tujun.
3. Ambeken Virus-virus si banci ncedaken kinieradan: merangap, ukur meganjang (sombong), ulin siakap dirinta asangken kalak si deban, egois entah pe hanya ngukurken keperlunna saja tanpa mperdiateken keperlun kalak sideban (individualis).
4. Perukurenta bali ras perukuren Jesus Kristus

Aplikasi

Diakonia GBKP e me kap sada i bas telu tugas panggilen gereja. I bas bimbingenta enggo jelas maka unit pelayanen si lit i bas GBKP e me kap :

1. Engkelengi anak melumang (PAK Gelora Kasih)
2. Mperdiateken kalak si berkebutuhen khusus (YKPC Alpha Omega)
3. Engkelengi orang tua lanjut usia (PPOS)
4. Engkelengi ODHA (komisi HIV/AIDS, NAPZA)
5. Pelayanan penanggulangan bencana
6. Pelayanen ekonomi masyarakat ras jemaat (CUM, CU, BPR PPK)

Pelayanen diakonia tingkat runggun banci ilakoken rikutken konteks masing-masing runggun si intina nehken kekelengen.

Patut kita ngataken bujur man Tuhan maka kerina unit-unit pelayanen enda tuhu-tuhu ernanam, jadi pasu-pasu (berkat) man kalak si deban. E maka arus tetap situmbuh-kembangken kepedulianta (mediate) nandangi unit-unit pelayanen si lit. Selain sibaba i bas pertotonta, perlu tetap kita ikut muat bagin arah nehken persembahenta rikut ras ide-ide si positif guna mengembangken dahin-dahin si enggo idalanken sedekah enda rikutken programna.

Kegiaten pelayanen (diakonia) merupaken kesaksianta selaku kalak si enggo ngaloken kekelengen i bas Tuhan nari. E maka kiniersadan si nteguh ras Tuhan bage pe sapih-sapih kita perpulungen (Koinonia) erbahanca megegeh kiniersadanta ras turah kepate guna sikeleng-kelengen sada ras si debanna, terlebih man kalak si membutuhken pertolongen i bas kita nari. Kekelengenta man kalak si deban merupaken perbahanenta (persembahenta) man Tuhan (bdk. Mat. 25:40). Janah mekatep si rusur jadi kendala i bas kita nehken kekelengen e, mbuesa teori, diskusi banci kari gedang. Mejile pemaparen e siban, tapi i bas praktekna kurang teridah. Mari sipelimbarui geluhta, benaken i bas dirinta masing-masing, maka kita si enggo nggejapken kekelengen i bas Tuhan nari, rutang pusuhta guna nehken kekelengen man kalak si deban si membutuhken. Melangkah guna nampati ola ibenai alu kebiaren ras kearun ate entah pe kebimbangen, tapi melangkah dengan iman maka sangapen mere asa ngalo, dingen i bas keriahen ukurta guna nampati pasti Tuhan tetap masu-masu geluhta. Ula ibenai alu kebiaren, mbue alasen, jungut-jungut, terpaksa, ukur si susah tapi benai alu kiniteken ras keriahen ukur maka ipake Tuhan kita jadi saluren pasu-pasu man kalak si deban.