Bimbingen Khotbah Minggu 22 November 2015

BIMBINGEN KHOTBAH MINGGU 22 NOVEMBER 2015

Pendungi Tahun Gereja

Pdt. Larena br. Sinuhadji (Nd. Reynard Tarigan)

Invocatio :

“Yesus Kristus reh denga pagi jadi hakim nandangi kalak si nggeluh ras si enggo mate. IpantekiNa pagin kinirajanNa” (2 Timotius 4:1a)

Ogen :

Lukas 12:2-43 (Anthiponal)

Khotbah :

Daniel 7:9-14

Tema :

KINIRAJAN DIBATA LA ERMASAP-MASAP

Minggu enda kita enggo bengket ku bas Minggu Pendungi Tahun Gereja ope kita bengket ku bas Minggu-minggu Advent. Janah biasana rikutken tradisi gereja i je kita mengenang, senina turangta si enggo leben lawes nandingken kita. Alu kata si deban mpersingeti kita maka la lit si kekal i bas doni enda, sada paksa waktu sitadingken doni enda. Alu bage sipindo gegeh Tuhan gelah tole reh pentarna kita makeken wari-wari kegeluhenta. Adi nina Tuhan Yesus i bas bahan pengogenta, “Arus kam mbuen rukur kerna kinirajan Dibata ras kebenarenNa gelah keperlundu si deban pe iberekenNa man bandu”.

Mekatep kebalikenna si iukurken kita, doni enda ras daya tarikna si erbahanca geluhta kurang-kurangen, la pernah erbias-bias, la ngasup kita ngataken bujur arah kai si enggo ibereken Dibata. Katawari paksa pe  mbiar kita, kelsehen, aru ate, la banci menikmati kegeluhen si enggo ibereken Dibata. Syarat hidup bahagia: hidup sederhana, banyak memberi, jangan banyak menuntut.

I bas pengogen jelas maka ikritik Tuhan Yesus kalak si katawari paksa pe aru atena, mbiar nandangi uis, pangan e me kalak si lenga erkiniteken man Tuhan. Erlajar arah perik kak, si la merdang, la rani, la lit lumbung tapi ibereken Tuhan pangan man bana. Ndauh hebaten kita asangken perik kak, merdang nge kita, erdahin rikutken dahinta masing-masing, rani kita, bahkan lit lumbungta (ada simpanan uang kita), e pe mbiar dengan kam nandangi kegeluhenndu, piah dungna ranggap kam, egois hanya mementingkan diri sendiri, pelit, bahkan menghalalkan segala cara guna memenuhi selera, guna banci mengikuti trend.

Ola aru atendu. Ise kin i bas kam ngasup pegedangken umurna alu er-aru ate. Si paling penting siendesken tetap kegeluhenta man Dibata si mada kuasa, si enggo terbukti kuasaNa nai-nai nari, genduari seh rasa lalap. Ras e me si icidahken bahan khotbahta i bas wari enda.

I bas bahan khotbahta ituriken maka Daniel i bas masa pemerentahen Belsyazar, raja Babel ernipi ras idahna pengenehenen-pengenehenen. I bas perikop sebelumna idahna kerna rubia-rubia lit empat si mulgap bas lawit nari. Enda nggambarkenca kerna 4 kerajaan si silih berganti menguasai doni enda. Babel, Media, Persia ras Yunani. Alu gegehna, kuasana ikacaukenna doni enda, sebab pemimpin-pemimpin enda la mbiar man Tuhan. Banci kataken, aminna pe megegeh, hebat kuasa bangsa-bangsa ndai, tetap beliden kuasa Tuhan. Kenca si e, idahna kerna Ia si nggeluh rasa lalap, kundul bas sada kursi. Uisna mbentar bagi salju. Ras melala si melayani Ia, lit meribu-ribu malekatNa. Ras ibenaken me pengadilen, ibuka kitab-kitab si berisi catatan kerna perbahanen si mehuli ras si la mehuli man kerina kalak. Rubia-rubia si ndai iidah Daniel e me si pe empatken ibunuh ras bangkena ibenterken ku bas api, sedangken rubia-rubia si deban ibuat kuasana, tapi ipelepas denga nggeluh seh paksa tertentu (bayangken alu kuasa Tuhan banci ibuat Tuhan kuasa-kuasa bangsa si deban ndai, hal enda nuduhken luar biasa kuasa Tuhan). Janah idahna ka sekalak manusia si nusur embun nari si ngadap man si nggeluh rasa lalap. Man baNa ibere kuasa, kehamaten ras kuasa kinirajan gelah kerina bangsa ras suku kai pe gia nembah ma baNa. Janah jelas kuasa si lit bas Ia rasa lalap ermasap-masap janah kinirajanNa la erkeri-kerin. Kai si iidah Daniel nuduhkenca, maka Dibata Bapa enggo mereken kuasa man Tuhan Yesus Kristus si enggo reh ku doni enda (Mat. 28:18, “Ideheri Jesus ajar-ajar, je nari nina, “Enggo ibereken Dibata man bangKu kerina kuasa i Surga ras i doni”).

Pengenehen Daniel banci kataken lit perbalina ras pengenehen Johanes tupung ia iambekken ku pulau Patmos i bas kitab Ketangkasen. Janah enda kerina fungsina gelah jemaat (bangsa Israel si sangana menderita itaban Babil) kuat, tetap ernalem man Tuhan. Termasuk i bas jaman Johanes i ja gereja-gereja mengalami peniksaan akibat kinitekenna man Yesus Kristus tetap setia ernalem man baNa. Sada hal si pasti Tuhan Yesus ngenca si enggo ibereken Dibata kuasa man baNa layak isembah, ipuji ras imuliaken ras kuasaNa la ermasap-masap. Beliden kuasa Tuhan asang kuasa kai pe.

Kai nge si paling ibiari manusia? Manusia takut menderita, manusia takut mati. Umumna kita takut menderita, mbiar kita mate. Tapi rikutken firman Tuhan ras kinitekenta, maka Anak Manusia, Tuhanta Yesus Krisuts enggo naluken kiniseran ras kematen janah menang Ia. Yesus Kristus usihenta, sabab man banta kalak si tek pe enggo iberekenNa kuasa arah pendahin Kesah si Badia. Ngasup kita naluken kiniseran ras kematen. I bas erbage-bage kiniseran si reh nderpa, ula elaken, hadapi! Tetap erpengarapen man Tuhan ras pegang janji Tuhan, imani! Perbeben e merupakan sada ujian gelah banci kita naik kelas, semakin imurniken kinitekenta.

La kita mbiar ngalaken kematen. Lit ende-enden, “Ku surga kesenangen e, kuje me perlawesku e, I rumah Bapa mbas ingan, gelah ku je aku lawes, ku je kam pe”. Kalak si tek man Tuhan enggo isikapken Tuhan kavlingta i surga. Janah adi ngerana kerna kematen, labo hanya soal fisik, tapi pe kematen rohani. Nggeluh kita tapi bagi kalak mate. Katawari paksa mbiar, la erpengarapen, kelsehen, rsd.

Enggo piga akhir tahun gereja sibentasi kita? Adi gundari umurta 40 tahun berarti 40 tahun pendungi tahun gereja sibentasi. Ertina kai? Tuhan tetap masu-masu ras ngkawali kegeluhenta. KuasaNa erdahin i bas kegeluhenta. Ula pernah raguken kuasa Tuhan. Andalken Tuhan i bas kerina dampar geluhta. Desken unta. Seekor unta, asum erpagi-pagi erjimpuh (berlutut) ia i lebe-lebe tuanna, guna muat baban si bakal ibabana sepanjang wari e ras asum berngi wari mulihi berlutut ka ia gelah banci ibuat tuanna baban i bas punggungna nari. Me bage seharusna kegeluhenta? Tetap erpengendes man Tuhan si mada kegeluhenta.