Bimbingen Khotbah Minggu 15 November 2015

BIMBINGEN KHOTBAH MINGGU 15 NOVEMBER 2015

Pdt. Larena br. Sinuhadji (Nd. Reynard Tarigan)

Invocatio :

“Gelah tuhu-tuhu malem ateku, kupindoken man bandu: ersada min arihndu, sikeleng-kelengen min kam, ersada min geluhndu dingen ersada ukurndu” (Pilipi 2:2)

Ogen :

1 Petrus 3:1-7 (Anthiponal)

Khotbah :

Josua 24:14-24 (Tunggal)

Tema :

KELUARGA SI ERKINITEKEN

Penjelasen Bahan Pustaka Si Badia

Bahan khotbahta e me kap pidato terakhir Josua man bangsa Israel, ope ia lawes nandingken doni enda (bdk. Josua 24:29, “kenca si e mate Josua anak Nun”). Tupung e umurna 110 tahun. Ipepulung Josua kerina suku Israel i Sikem: Pertua-pertua, Pemimpin-pemimpin, Hakim-hakim ras Kepala-kepala Pasuken Israel.

Ise kin Josua? Josua  e me kap abdi Musa. Karakterna: 1) sabar (tupung Musa 40 wari 40 berngi i deleng Sinai itimaina alu saber Tuhan mereken 10 Perentah Tuhan); 2) berani (memimpin peperangen ras bangsa Amalek, i ja Musa, Harun ras Hur i datas deleng, sedang Josua ras tentera Israel erperang melawan bangsa Amalek); 3) jujur (12 kalak pengintai, 10 kalak pesimis ras ngataken si la tuhu, sedang Josua ras temanna Kaleb optimis ras ngataken kebenaren); 4) setia i bas ngikutken Tuhan seh ku ujungna.   

I bas pidato terakhirna, Josua mpetetap ukur bangsa Israel gelah ula ersung-sung i bas ngikutken Tuhan maka lebe isingetken Josua kerna keleng ate Tuhan si ialoken bangsa Israel. I ja Dibata si tetap masu-masu bangsa Israel mulai kin nini-ninina idilo Tuhan i tepi Lau Eprat nari seh ku perdalanen Mesir nari ku Kanaan. Janah berikutna Josua mereken keteladanen, pengaruh si positif selaku ia pemimpin. Josua la memaksaken kehendakna. Josua mereken kebebasen man bangsa Israel, tapi ia sendiri jelas pendirianna, erprinsip. Ay. 24, “Dage genduari,” nina Josua ngumputi rananna, “Pehagalah TUHAN janah sembahlah Ia alu tutus ate ras patuh. Pedauhlah dibata si nai isembah nini-ninindu i Mesopotami ras i Mesir, janah man TUHAN sajalah kam ersembah. Adi la iakapndu mehuli ersembah man TUHAN, pilihlah sendah ise atendu isembahndu, dibata si isembah nini-ninindu i Mesopotami, entah dibata kalak Amori si inganindu tanehna genduari. Tapi adi aku ras isi jabungku, TUHAN saja ngenca isembah kami.” Siidah i jenda Josua tegas i bas erkiniteken.

I bas bahan ogen, siidah Petrus mereken kata telah i bas hubungen ndehara ras perbulangen. Secara khusus ndehara tuhu-tuhu banci jadi penolong, nampati perbulangenna si lenga tek nandangi kata Dibata kedungenna banci tek erkiteken perbahanen ndeharana. E maka Petrus mempertegas maka si perlu itingkatken e me kap kinijelen bas pusuh nari (kinijelen batin - inner beauty : lemah lembut, ukur teneng, kesabaren, kekelengen) asangken kinijilen fisik. Sabab kinijilen fisik sementara. Janah tanggung jawab suami arus nggeluh dem pengertian man ndeharana (saling menjiwai, saling memahami), bahkan arus iangkaina maka gegehen perbulangen asangken ndehara. Perbulangen pe arus mehamat man ndeharana (hormatilah mereka sebagai pewaris dari kasih karunia). Ertina, sebagai dua pribadi si enggo ipersada Tuhan maka perbulangen ras ndehara arus nggeluh sihamaten, sikelengen pekepar gelah ola lit si ngolangi pertoton ku Tuhan (kegeluhen i bas jabu lit i bas dame sejahtera).

Aplikasi

Keluarga si erkiniteken e me kap keluarga si tetap  ernalem man Tuhan i bas kerina kegeluhen jabuna. Labo dibata-dibata si deban (kuasa perdukunan, materi, kinibayaken) ingan penalemenna, tapi Tuhan si enggo mpersadaken jabu e. Adi ateta keluarganta erkemalangen man Tuhan arus lebe orang tua (bapa ras nande) jadi usihen man isi jabu, bagi si iteladanken Josua. Josua tuhu-tuhu idalankenna tanggung jawabna sebage imam i tengah-tengah jabuna.

I bas perdalanen kegeluhen jabu pasti lit nge erbage-bage permasalahen si timbul, tapi i bas si e arus tetap sigejapken uga kekelengen Tuhan si enggo naruhken kegeluhen jabunta wari lepas wari mentasi erbage-bage persoalen. Terkadang i bas litna persoalen erbahanca la nari banci sigejapken kekelengen Tuhan si enggo ipepalerNa. E maka i bas si e perlu tetap kita nginget ras penanam-nanam kekelengen Tuhan si erbahanca tetap kita ngasup ngataken bujur i bas kerina dampar geluhta (anak-anak, kesehaten, rejeki, rsd.). Keluarga si erkiniteken geluhna pe ernanam man kalak si deban.