Bimbingen PJJ 16 - 22 November 2014

BIMBINGEN PJJ 16 - 22 NOVEMBER 2014

(ADVENT)

Pdt. Larena br. Sinuhadji (Nd. Reynard Tarigan)

Ogen :

1 Petrus 4:7-11

Tema :

NGGELUH RAS ERGAKENLAH PEMERE DIBATA

Tujun : Gelah ngawan ni perpulungen:

Ngergaken pemere Dibata ibas kegeluhenna

Ersikap, erkiniteken ibas ngalo-ngalo ketubuhen Jesus bage pe kerehenNa si peduakaliken

Surat Petrus enda itujuken man kalak Kristen si merap marpar i belang-belang bagin utara Asia Kitik si sangana ngenanami kiniseran (Turki gundari), subuk kiniseran i bas darat nari, penyiksaan, tekanan, i bas pemerentah Romawi nari erkiteken kinitekenna man Tuhan Jesus. Kiniseran si peduaken rehna arah perpulungen nari, lit anggota perpulungen i ja sikap geluhna la jadi teladan tapi jadi batu antuken. Erkiteken buena tekanan, kiniseran e, maka kurang pedas iakap perpulungen kerna kerehen Tuhan si peduakaliken, gelah pulah ibas kerina kiniseran nari. E maka i jenda ilumbaken Petrus hal-hal si penting i bas tetap nimai kerehen Tuhan Jesus si peduakaliken.

Kerehen Tuhan Jesus si peduakaliken enggo ndeherer, aminna pe la sieteh digan waktuna, bali ras kerehen sekalak penangko (bdk. 2 Pet. 3:10). Si paling penting si arus tetap ilakoken perpulungen e me :

1. Menguasai diri dingen peteneng ukur gelah ngasup tetap ertoto. Ertoto emekap membangun komunikasi, kerembakenta ras Tuhan. Ibas kita mampu menguasai dirinta ras teneng ije makana kita banci alu khusuk ertoto man Tuhan. Adi sibandingken bas Luk. 21:29- i ja ituriken Tuhan Jesus kerna kai si bakal terjadi ibas pendungi jaman, maka nasehat Tuhan Jesus pe gelah tetap kita erjaga-jaga ras tetap ertoto gelah banci pulah ibas ngalaken erbage-bage kiniseran ras tetap ngasup tedis i lebe-lebe anak Manusia si isuruh Dibata.
2. Si paling penting e me kap sikeleng-kelengen sada ras si debanna, alu tulus ras tutus, tanpa lit i je unsur pamrih/balas jasa. Ibas 1 Kor. 13:13, Paulus ngatakenca 3 hal si tetap banci silakoken, janah si paling penting ibas si 3 e e me kap ngkelengi kalak si deban. Termasuk kai si enggo iteladanken Tuhan Jesus maka kita kalak perdosa, si aturna la patut kita ibenarken tapi ibenarken erkiteken kekelengen i bas Jesus Kristus nari si enggo nasapken kita i bas dosa nari (bdk. Rom. 5:17).
3. Metemue alu la jungut-jungut (bdk.  Heber 13:2 “Ingetlah ngalo-ngalo kalak si reh kesilang ku rumahndu. Lit piga-piga, asum ialo-alona kalak si kesilang ku rumahna, alu la ietehna enggo ialo-alona malekat”).
4. Saling melayani (bhs. Ind), sabab enggo ibereken Tuhan talenta si pelain-lain man banta, janah arus sipergunaken talenta e labo hanya guna dirinta tapi guna kiniulin kalak si deban. Pengerananta banci menyejuken, memotivasi kalak si deban. Ibas kita nampati pe, nampati alu gegeh si ibereken Dibata man banta.

Arah kerina si nilakoken perpulungen, maka arah si e gelah Dibata tetap terpuji. Masa Advent, masa penantian, masa i bas kita nimai kerehen Jesus Kristus i bas peduakaliken sekaligus mperingeti ketubuhenNa ku doni enda. Alu bage i bas masa penantian e tetaplah sipakeken biak-biak si mehuli si ngena ateNa.