Bimbingen Khotbah Minggu 16 November 2014

BIMBINGEN KHOTBAH MINGGU 16 NOVEMBER 2014

Pdt. Larena br. Sinuhadji (Nd. Reynard Tarigan)

Introitus :

“Kita ipilih Dibata labo gelah si nanami ukumen si reh i bas Ia nari, tapi gelah sialoken keselamaten arah Tuhanta Jesus Kristus” [1 Tesalonika 5:9]

Ogen :

1 Tesalonika 5:1-11 [Tunggal]

Khotbah :

Sepanya 1:7, 12-18 [Tunggal]

Tema :

WARI TUHAN REH ME 

1. Sepanya, banci ikataken nabi si luar biasa sebab ia kesusuren raja. Nini bulangna e me kap raja Hiskia, raja Yehuda pe-13-ken (716-687 SM). Gelar “Sepanya” ertina: “Yahwe menyimpannya.” Janah sue bagi gelarna, maka nabi enda isimpan Dibata guna jadi “juru bicara Allah” i bas waktu si enggo itentukenNa. Sepanya melayani sebage nabi Tuhan i bas masa pemerentahen raja Josia anak Amon (640-608 SM). Josia tercatat sebage raja si mehuli dingen mbiar man Tuhan ibas masa pemerentahenna, aminna umur 8 tahun paksa si e, ia jadi raja gantiken bapana Amon si seh kel jahatna (2 Taw. 34:1). 10 tahun kenca ia jadi raja, e me kap i bas usiana 18 tahun, ilakokenna refomasi rohani secara nasional (2 Taw. 34:8). Tapi kepeken banci siidah, kebangunen kiniteken si ilakoken Josia labo maba pertobaten si sungguh-sungguh man rayatna. Banci jadi erkiteken kejahaten si enggo berakar ilakoken bangsa Israel sedekah enda, e me kap i bas masa pemerentahen dua raja, Manasye ras Amon (2 Raja 21:9-17, 2 Taw. 33:9, 21-22), seh makana enggo pe ipimpin raja si sungguh jadi usihen, taat, mbiar man Tuhan, labo maba perubahen ku si mehuli. Pertobaten ibas kulit luarna saja.
2. Ibas perikopta enda, Sepanya ngelumbaken kerna wari Tuhan, e me kap wari ukumen ibas Tuhan nari. Banci siidah arah perikop, maka pengangkan si salah turah i bas kalak Israel kerna wari Tuhan. Ija umumna kalak enda tek maka wari Tuhan e me wari si menyelamatkan man bangsa Israel sebalikna, wari si maba kiniseran man musuh bangsa Israel entah pe bangsa-bangsa si deban. Tapi nabi Sepanya ngatakenca, maka wari Tuhan e wari si maba kiniseran kerina manusia termasuk pe man kalak Israel si la setia man Tuhan (ay. 4, Kuukum kerina kalak si ringan i Jerusalem ras kerina kalak Juda”), termasuk pe rubia-rubia ikut ngenanami kiniseran (ay. 2). Jelas enda erkiteken dosa-dosa si ilakoken bangsa enda. Dosa-dosana eme : 1) Sinkretisme : menyembah kepada allah-allah lain, bage pe ersembah man dua Tuhan. “Erkemalangen man bangKu, tapi kenca bage ersumpah ka ia ibas gelar Dewa Milkom” (ay. 5b); 2) Si erkuasa, menyalahgunakan kekuasaanna (ay. 8); 3) Nangko, munuh ras memenuhi rumahna alu barang rampasen (ay. 9); 4) Hamba Tuhan la ndalanken fungsi bagi si ngena ate Tuhan (Ps 3:4, “Nabi-nabina la ertanggung jabab, la terteki; imam-imamna ngeliami kai si badia, dingen ipegedukna Undang-undang Dibata guna keuntungenna jine”).
3. Bangsa Israel terlalu percaya diri, mengira statusna sebage umat Tuhan, maka wari Tuhan e maba kemalemen ate man bana ras kiniseran man musuh-musuhna. Padahal jelas, wari Tuhan si nimaksud Sepanya itujuken man ise pe termasuk umat Israel. Bangsa enda terlalu percaya diri ibas nima-nimai wari Tuhan tanpa mengevaluasi perbahanenna sedekah enda (bdk. Umat Tuhan ibas jaman Amos, Amos 5:18-20 “Andiko, cilaka me kam si ertedeh ate nandangi kerehen wari TUHAN ! Kai kin untungna man bandu kerna wari e? Wari e, wari kegelapen kap man bandu, labo terang. Tupung si e bali kap ras sekalak jelma si pulah i bas babah arimo nari tapi ndabuh ku babah buaya! Tah pe bagi sekalak jelma si mulih ku rumahna; tupung tertande ia ku dingding, itagut nipe tanna! Wari TUHAN , tuhu-tuhu sada wari si gelap labo lit sitik pe terangna.” Bahan khotbah minggu si nderbih, kurang pedas akapna ibas kerehen wari Tuhan). Bahkan lit pengangkan seolah-olah Tuhan la bertindak, entah pe cuek saja i bas kai pe si nilakokenna manusia (bdk. ay. 12, “Kai pe labo ibahan Tuhan, subuk si mehuli entah si jahat”). Tapi Tuhan bertindak, Tuhan tidak diam. Ija ipebali Tuhan ras tukang potong asuh-asuhen (ay. 7, “Tuhan enggo sikap nggeleh bangsaNa desken asuh-asuhen persembahen”) Wari Tuhan, wari pernembeh ate si gara, wari kiniseran ras aru ate, wari kerontasen ras kemasapen, wari si getem ras gelap. Bahkan erta kebayaken si ipepulungna pe sedekah endal labo ngasup ngkelinisa bangsa e, labo banci nampati.
4. Ogen, surat Paulus man perpulungen Tesalonika gelah ersikap i bas kerehen Tuhan si peduakaliken. Jelas Paulus ngatakenca, maka wari Tuhan e bagi pinangko, la ise pe kita metehsa. Tapi sebage anak-anak Tuhan ula kita terlena, santai piah dungna kita sengget, pangajaren si turah, “kerinana tenang dingen aman … ndekah denga,” piah dungna kita tertaren-taren guna bertobat ras ndalanken si ngena ate Dibata. Paulus mpersingetisa, maka kita e me kap anak-anak terang, e maka la patut tunduh bagi kalak si deban. Perpulungen arus tetap metenget dingen jore ukurna. Arus tetap sipake kiniteken ras keleng ate jadi ampang-ampang tententa, janah pengharapan guna selamat jadi tengkulukta. Sebab kita ipilih Dibata labo gelah iukum tapi gelah ngaloken keselamaten arah Tuhan Jesus Kristus nari si enggo mate guna manusia gelah banci manusia nggeluh ersada ras Jesus, subuk kita nggeluh denga entah pe mate asum Jesus reh peduakaliken.
5. Ibas PL, wari Tuhan lit dua pengertianna, e me kap penghukumen man kalak si jahat ras wari kelepasan man kalak si setia, dingen nggeluh ibas pertobaten. Umumna, merujuk i bas sada paksa si enggo ndeher ras segera terjadi (Yes. 13:6; Yeh. 30:3; Yoel 2:1, 3:14). Bas perikop pe teridah wari Tuhan e ikataken enggo ndeher, ay. 7, “Wari Tuhan enggo ndeher”; ay. 14, “Wari Tuhan si mbelin e enggo ndeher - enggo seh kal deherna janah pedas me ia reh.” Sedangken bas PB, wari Tuhan umumna menunjuk ku bas pendungi jaman/akhir jaman (Perb. 2:20; 1 Kor. 1:8; 2 Kor. 1:14; Luk. 21:34; 1 Tes. 5:2; 2 Pet. 3:10). Banci isimpulken maka wari Tuhan e, e me kap waktu i ja Tuhan bakal bertindak/ngelakoken rencanaNa man manusia, subuk kesenangen, keselamaten, kemulian man kalak si tek, bage pe sebalikna kengerian, kegelapen, kiniseran seh rasa lalap man kalak si la tek dingen la ndalanken si ngena ate Dibata (Mat. 25:30; Mat. 25:46, “Bengket me kalak si arah kawes e ku bas ukumen si rasa lalap”).
6. Kadang kita terlalu “pede” bagi bangsa Israel, yakin masuk surga tapi kinitekenta man Tuhan la teridah ibas pengkebet geluhta (bdk. Mat. 7:21-23 “Labo kerina kalak si erlebuh man bangKu, “O Tuhan, Tuhan!” bengket ku bas Kinirajan Surga, tapi kalak si ngelakoken rikutken si ngena ate bapangKu i Surga nge bengket ku bas Kinirajan e. I bas wari pendungi pagi, nterem kalak ngataken man bangKu, “O Tuhan, Tuhan! I bas gelarNdu ernubuat kami, i bas gelarNdu ipelawes kami setan-setan dingen ibahan kami tanda-tanda sengget. Tapi ningKu pagin njabapsa, “La kam Kutandai pe. Laweslah i bas Aku nari, o kalak jahat!” Hanya Kristen KTP, Kristen tanpa pertobatan).
7. Lit ka deba, terlalu santai, terlena erkiteken kesenangen, kesibuken doni, seh makana “sengget” tupung Tuhan reh, “dekah denga nge,” nikmatilah asum banci denga sinikmati, labo diatena perpulungen, la lit kekelengen, sibuk dengan dunianya sendiri. Uga persikapenta, sabab enggo pasti wari Tuhan reh me, amin la sieteh dingan wari na Ia reh. Tapi sebage anak-anak terang, si enggo iselamatken Tuhan arus tetap kita ngerembaken diri ras Tuhan. Di luar Tuhan la banci kita erbahan kai pe. Lit 3 si tetap arus sidalanken, eme erkiniteken man Tuhan, erpengarapen man Dibata ras erkeleng ate man manusia.