Bimbingen PJJ 02 - 08 November 2014

BIMBINGEN PJJ 02 - 08 NOVEMBER 2014

Pdt. Larena br. Sinuhadji (Nd. Reynard Tarigan)

Ogen :

1 Korinti 10:31-33, 11:1

Tema :

ERGUNALAH MAN KALAK SI DEBAN

Tujun :

Gelah ngawan ni perpulungen :

Meteh uga rasul Paulus banci jadi usihen man perpulungen

Tetap ndalanken sebage usihen ibas kegeluhenna 

1. Konteks perikopta ngerana kerna kai pe silakoken kita gelah tama kemulian man Tuhan ras ula jadi batu antuken man kalak si deban. Labo ibas perikop enda saja Paulus ngerana kerna pangan khususna si enggo ipersembahken man berhala, tapi pe ibas 1 Kor. 8. Jelas teologia Paulus ngatakenca maka pangan labo maba kita reh deherna ras Dibata. Bicara la sipan pe labo lit rugina, bicara sipan pe labo lit untungna. Tapi metengatlah kita, gelah ola min kebebasenta e erbahanca maka guling kalak si merampek kinitekenna (ps 8:8,9).
2. Paulus pe ngatakenca, adi lit pe kalak si la tek nenahken kita man, ras tetap ukurta ndahisa, panlah kai pe si enggo ihidangkenna man banta alu la palah nungkun-nungkun pusuhndu (ps. 10:27), tapi adi lit kalak si keberaten sebab pangan e enggo ipersembahken man berhala, ola pan pangan e, erkiteken kalak si ngatakenca man ban banta ras erkiteken penggejapen kalak si ngatakenca man banta (sekali nari nina Paulus, labo penggejapenta, tapi penggejapen kalak si ngatakenca man banta). Ertina, lebih kita ngukurken kalak  si deban gelah ola sempat bene kinitekenna arah kai siban kita, sabab memang banci jadi merampek denga kinitekenna.
3. Pandangen Paulus e eme si jadi polemik ibas piga-piga perpulungen, alu ngatakenca, “Engkai maka penggejapen kalak si deban jadi hakim nandangi kebebasenku? Adi ngataken bujur nge aku man Dibata kerna pangan e, ngkai maka ipandang kalak aku, sedangken kukataken nge bujur man Dibata kerna pangan e?” (1 Kor. 10:29b-30). Ketidakpuasen enda iujungi Paulus alu ngatakenca maka kerina si nilakoken kita, subuk man entah minem, bahanlah si e kerina tama kemulian man Dibata. Ola sibahan kitik ukur kalak, subuk kalak Jahudi entah kalak perbegu, entah pe perpulungen Dibata.
4. Ras memang Paulus erlajar, selaku ia Rasul Tuhan, maka ia jadi usihen, aminna pe labo hal si gampang, tetap ipala-palai Paulus. Labo keuntungenna secara pribadi si idaramina, tapi keuntungen kalak si nterem alu tujun imenangken kalak ndai lako banci tek man Kristus. Sabab dikenca enggo kitik ukurna, enggo mesera guna dalan masuk nehken Berita si Meriah.
5. Teologi Paulus enda labo ka erbahanca mpeturah sikap oportunis, menghilangkan si prinsip, si penting gelah senang kalak man banta. Labo bage. Tetap si ilakoken kita e, banci sipertanggungjawabken man Tuhan, guna kemulian man Tuhan. Hal-hal si la prinsip, si la ncedai kinitekennta, banci ikompromiken, ija kita sebagai kalak si lebih megegeh kinitekenna, siusahaken gelah kita banci lebih mengerti kalak si la megegeh kinitekenta. Arus lit pengorbanen ibas geluhta, terlebih-lebih kita tading ras kalak si pelain-lain (majemuk/heterogen), subuk suku, agama, sosial, tingkat pendidiken, rsd. Emaka arus mampu kita mengerti, memahami keberadaan kalak, tapi ula sempat ncedai kinitekenta. Umpamana, perban mbiar kita man kalimbubunta emaka sisineken saja ia aminna pe enggo ia melanggar (kiniteken si ndekah, ku dukun, niktik wari ope erbahan kerja) entah pe berkaiten ras moral, sieteh lit ‘simpanen’ tapi pura-pura la sieteh, dingen la pernah sipersingeti sebab mbiar ceda perkade-kadenta.
6. Paulus pang ngatakenca usilah dage aku, bagi aku pe ngusih Kristus. Enda me si jadi perayakenta selaku kalak si tek, terlebih Serayan Tuhan, pang kita ngatakenca, usilah aku, sabab memang geluhta arus jadi sira ras terang (Mat. 5:13-16). Pernyataan enda labo dalam rangka kesombongan rohani tapi paling tidak penjemba man banta secara pribadi lebe, arah kai sibelasken sedalanen ras si ibahan kita. Mungkin ibas hal kekelengen kita banci jadi teladan, ibas kedispilinen, ibas hal bertanggung jawab, ibas kesabaren, mejingkat, ngiah-ngiahken, paling tidak lit karakter positif si arus lit peningkatenna wari lepas wari. Siusahaken arih. Tuhan memberkati.