Bimbingen Khotbah Minggu 23 November 2014

BIMBINGEN KHOTBAH MINGGU 23 NOVEMBER 2014

(PENDUNGI TAHUN GEREJA)

Pdt. Larena br. Sinuhadji (Nd. Reynard Tarigan)

Introitus :

Efesus 1:17 “Kupindoken man Dibata Tuhanta Jesus Kristus, Bapa si ermulia, gelah iberekenNa man bandu kesah kepentaren dingen ipetangkasNa diriNa man bandu gelah itandaindu Ia”

Ogen :

Esekiel 34:20-24 (Responsoria)

Khotbah :

Efesus 1:15-23 (Tunggal)

Tema :

PAKEKENLAH KESAH KEPENTAREN DIBATA

Penjelasen Bahan Khotbah

Bagin khotbah e me kap kerna pertoton Paulus nandangi perpulungen Epesus si tetap setia erkiniteken man Tuhan Jesus. Si pemena, Paulus mereken apresiasi nandangi perpulungen si enggo tek man Tuhan Jesus Kristus ras kiniteken si icidahken perpulungen alu saling ngkelengi sada ras si debanna (ay. 15, bdk. Perb. 2:43-47). Si peduaken, je nari Paulus la lupa ngataken bujur man Dibata, sabab igejapiNa maka perpulungen banci berkembang erkiteken perkuah ate Tuhan ras tetap ia ertoto nandangi perpulungen. Isi pertoton Paulus e me kap :

1. Gelah ibereken Tuhan Kesah Kepentaren man perpulungen (semakin bijaksana) gelah banci perpulungen nandai Dibata alu payo (Ind. supaya Ia memberikan kepadamu Roh hikmat dan wahyu untuk mengenal Dia dengan benar).
2. Gelah italangi Tuhan pusuh perukuren perpulungen, gelah terang pengangkan perpulungen, alu bage tuhu-tuhu igejapi perpulungen maka mbue kel pasu-pasu Tuhan nandangi perpulungen, e me kap erta-erta si mulia si isikapken Dibata man anak-anakNa. Ras pe tuhu-tuhu igejapi perpulungen seh kel belinna kuasa Dibata si tetap erdahin nandangi kalak si tek man Tuhan. Maka kuasa si lit ibas kita kalak si tek e, bali ras kuasa Tuhan si mbelin si ipakeNa asum Ia mpekeke Jesus ibas si mate nari. Kuasa Tuhan si ndauh ganjangen asangken kerina kuasa pemerentah ras kuasa si la teridah, dingen ganjangen asangken kerina pemimpin ras tuan-tuan si la teridah. Janah pangkat Tuhan pe ganjangen asa kerina pangkat si terbelasken, subuk ibas paksa enda, bage pe si reh pagin.

Arah si isuratken Paulus maka ia sebage Rasul Tuhan (pemimpin) mediate (peduli) nandangi perpulungen, labo saja si lit persoalenna, tapi pe si tetap setia erkiniteken man Tuhan. Maka arus igejapi perpulungen kuasa si enggo ibereken Tuhan, si ndauh beliden asa kuasa kai bas doni enda.

Sebage pemimpin, Rasul Paulus tetap ia ertoto, sebab arah pertoton e maka ia megegeh, mediate, njadiken Rasul Paulus pemimpin jemaat si mbelin i bas sejarah kekristenan.

Penjelasen Bahan Ogen

Judul perikop i bas ogenta e me kap “Permakan Si Mehuli.” Inti bas perikop enda e me kap, Tuhan sebage Permakan Si Mehuli nandangi biri-biriNa (bangsa Israel), ibandingken ras Pemimpin-pemimpin Israel. I jenda Tuhan arah nabi Esekiel ngajari pemimpin-pemimpin bangsa Israel gelah jadi pemimpin si mehuli, si tetap mediate nandangi asuh-asuhenna e me kap bangsa Israel (bdk. “O manusia si ermasap-masap, momokenlah kesalahan peminpin-peminpin Israel. Ernubuatlah kam man bana, janah pesehlah man bana katangKu, Aku TUHAN si Erdolat, bagenda: “Cilaka me kam, o permakan-permakan Israel! Dirindu saja ngenca ipekena-kenandu. Susuna inemndu, uisndu mbulu biri-biri, apai biri-biri si mburna igelehndu man panganndu. Tapi biri-biri e la pernah ipekena-kenandu. Biri-biri si la megegeh la iarak-arakndu, si sakit la itambarindu, janah si luka la ibalutindu, si papak la iembarindu, janah si bene la idaramindu. Tapi kejam kal perbahanenndu man biri-biri e” ay. 2-4).

Arah pengogenta enda, Tuhan ngajari maka pemimpin si mehuli e me kap berlaku adil ras membela si lemah. Ikelini Tuhan kerina biri-biriNa si mehuli janah la ise pe banci pesega-segasa. Janah iangkat Tuhan sekalak pemimpin si mehuli, bali raja Daud ndube.

Kesimpulen

Tema : “Pakekenlah Kesah Kepentaren Dibata.” Paulus ras Esekiel jadi pemimpin si mehuli erkiteken tetap ia mindo man Dibata gelah ibereken Dibata Kesah Kepentaren e arah pertoton. Tuhu mberat pelayanen Paulus, si awalna ia iayak-ayak, icurigai, itolak, tapi banci membangun perpulungen seh berkembang, enda kerina erkiteken Kesah Kepentaren Dibata si tetap erdahin ibas diri Paulus. E maka arah Paulus ras Esekiel ipersingetina kita, sebage pemimpin i tengah jabu (sebage bapa, nande), sebage pemimpin pelayan i bas pelayanenta i bas peken anggur Tuhan (sebage serayan Tuhan), sebage pemimpin i bas inganta erdahin, tetap kita makeken Kesah Kepentaren Dibata gelah tetap banci ndalanken tanggung jawabta alu mehuli. Kesah Kepentaren e me kap Kesah si Badia si enggo ibereken Dibata man banta kalak si tek. Dingen Kesah e tetap erdahin i bas kita ernalem man baNa ibas kerina dampar kegeluhenta.

Ibas minggu Pendungi Tahun Gereja enda, mari ras-ras sirenungken mulihi kerna keleng ate Dibata nandangi kita sedekah enda, katakenlah bujur erkiteken iberekenNa denga kesempaten man kita guna makeken Kesah Kepentaren e i bas kegeluhenta. Mungkin sedekah enda kepentarenta denga si usur sipake guna mimpin diri sendiri. E maka ertekad kita guna makeken hak istimewa si enggo ibereken Tuhan man banta e me Kesah Kepentaren i bas Kesah si Badia. Pindolah arah pertotonta gelah Dibata si mereken pergegeh guna mpengasup kita makeken Kesah Kepentaren e ibas kerina dampar kegeluhenta.