Bimbingen Khotbah Minggu 09 November 2014

BIMBINGEN KHOTBAH MINGGU 09 NOVEMBER 2014

Pdt. Larena br. Sinuhadji (Nd. Reynard Tarigan)

Introitus :

“Jenari nina Jesus, “Dage ersikap-sikaplah sabap la ietehndu warina entah pe jamna Tuhan reh.” [Matius 25:13]

Ogen :

Amos 5:18-24 [Tunggal]

Khotbah :

Matius 25:1-13 [Tunggal]

Tema :

ERSIKAPLAH 

1. Bahan khotbah minggu enda ituriken Tuhan Yesus arah bentuk perumpamaan e me kerna Kinirajan Surga si ipebaliNa ras kerja erdemu bayu. Kristus e me kap si empo ras kalak si tek (gereja) eme pengentin si diberu. Ituriken i jenda kerna 10 kalak si nguda-nguda si ersikap guna ngalo-ngalo si empo. Ibas si 10 si nguda-nguda e, lima kalak lenge, ras lima kalak pentar. 10-na kalak enda seri tindakenna, ibabana lampuna, nimai si empo janah erkiteken melawen maka reh si empo, maka munduk-munduk ia kerina jenari tunduh ia kerina.  Si mbedakennca, si pentar babana persikapenna, emekap minak tambahen, sebab memang enggo iukurina, entah melawen kari reh si empo. Sedang
   diberu si lenge sama sekali la babana minak cadangen. Emaka pindona sitik minak man si nguda-nguda si pentar e. Tapi la ibere, alu pertimbangen la kari bias minak kalak enda ka. Emaka iberekenna solusi gelah tukurna ku kede. Kepeken asum lawes kalak enda nukur minak e, reh me si empo. Emaka si nguda-nguda si enggo ersikap nimaisa ndai bengket ku ingan si enggo isikapken guna kerja e ras si empo. Kedungenna, reh me si ngua-nguda si lenge ndai tapi pintu enggo ieruk, janah aminna pe idilona si empo e piga-piga kali, pintu la nari italangi, bahkan nina si empo lima kalak diberu si lenge e la itandaina. Emaka perumpamaan enda iujungi alu Jesus, “Dage ersikap-sikaplah sabab la ietehndu warina entah pe jamna Tuhan reh.”
2. Jelas arah perumpaan enda ate Tuhan Yesus ngelumbaken man pembaca termasuk kita, maka kerehehenNa si peduakaliken e la ise si metehsa, sabab kerehenNa bagi pinangko (2 Pet. 3:10, “Tapi wari kerehen Tuhan bali ras kerehen sekalak pinangko”), emaka arus kita ersikap katawari paksa pe, ula lengah ras tetap bertekun seh kedungenna (band. Yoh. 8:31, 1 Yoh. 2:19). Sabab memang lit deba pengangkanta, enggo aku selamat (terkelin), enggo kutandai Jesus, enggo aku tek man Yesus, janah e enggo cukup. Kinitekenta e arus tetap sijaga seh kedungenna (band. Nina Paulus “Enggo kupala-palai asa ngasupku i bas perlumban e, enggo seh aku ku garis batas, janah enggo kucikep kiniteken e,” 2 Tim. 4:7). Labo terjeng ku gereja ras aktif bas kerina kegiaten, tapi ketutusenta e arus ka sibarengi alu pengkebet geluhta si tetap mpermuliaken Tuhan. Ogen si pemena jelas mpersingeti kita, nina Tuhan, “Ciga ateKu perayan-perayan agamandu; mutah Aku ngidahsa! Adi ibahanndu persembahen tutungen ras persembahen gandum, la Kualoken. Asuh-asuhen si enggo ipeburburndu janah ipersembahkenndu bangKu pe la Kualoken. Ende-endenndu pe gejek Kuakap; pengadilah e. La ateKu bage megiken sora kulcapindu. Tapi bahanlah maka kebujuren erburak-burak desken lau sumbul, dingen kebujuren desken lau belin si la pernah kera.” Tuhan menuntut bukan sesuatu yang bentuknya formalitas, rutinitas dan kemunafikan, tapi perbahanen si tuhu-tuhu erbahanca Tuhan termulia ras geluhta pe jadi berkat arah kita ndalanken kebenaren, keadilen dingen nehken kekelengen.
3. Janah labo ka berarti ibas kita nimai kerehenNa si lenga sieteh ndigan e, mabai kita tetap fokus ku bas kegiaten-kegiaten rohani piah dungna kegiatenta si tetep-tep wari terbengkalai, entah e sitadingken. Ras e me kegiaten sekte sesat subuk di luar ras dalam negeri (bagi sekalak Pdt., i Bale Endah Bandung selatan, i ja enterem pengikutna nandingken dahinna, profesina, ras fokus rende, ertoto semalam suntuk, landek-landek rsd. Bage pe peristiwa Okt. 1992, kalak Kristen i Korea nandingken dahinna, dayakenna rumahna, igugurkenna kandungenna, ras pulung ibas sada ingan, guna nimai kerehen Yesus peduakaliken. Enda jelas pemahamen si salah ibas nimai kerehen Yesus peduakaliken.
4. Lima gadis si pentar e memang la iberekenna tupung ipindo temanna si lima kalak ndai minak guna penambahi sebab mbiar bas ia pe la cukup. Labo enda berarti maka kalak si pentar enda la lit kekelengenna. Tapi Firman Tuhan mpersingeti kita guna keselamatenta, setiap pribadi arus bertanggung jawab ibas njagai keselamatenna, la banci kita mendompleng ibas persikapken kalak si deban, termasuk pasangenta sendiri pe (band. Roma 14:12, “Dage sekalak-sekalak kita arus pagi mereken pertanggungenjawabenna man Dibata guna dirina jine”).
5. Bertobatlah kita sebelum terlambat ras pintun enggo ieruk la nari kita banci bengket ras si ngerina, Yesus pe la nandai kita. Lit kata bijak ngatakenca “kerajinan di kemudian hari tidak bisa menebus kelalaian pada masa lalu.” Banci jadi teman-temanta nandai kita sebage kalak Kristen, KTP-na Kristen, tapi apakah Yesus nandai kita? (band. Mat. 7:21-23, “Labo kerina kalak si erlebuh man bangKu, 'O Tuhan, Tuhan!' bengket ku bas Kinirajan Surga, tapi kalak si ngelakoken rikutken si ngena ate bapangKu i Surga nge bengket ku bas Kinirajan e.I bas wari pendungi pagi, nterem kalak ngataken man bangKu, 'O Tuhan, Tuhan! I bas gelarNdu ernubuat kami, i bas gelarNdu ipelawes kami setan-setan dingen ibahan kami tanda-tanda sengget.' Tapi ningKu pagin njabapsa, 'La kam Kutandai pe. Laweslah i bas Aku nari, o kalak jahat!' Emaka ersikap lah kita katawari paksa pe, bertekun seh kedungenna.