Bimbingen PJJ 09 - 15 November 2014

BIMBINGEN PJJ 09 - 15 NOVEMBER 2014

Pdt. Larena br. Sinuhadji (Nd. Reynard Tarigan)

Ogen :

Kejadin 39:21-23

Tema :

TERANDALKEN

Tujun : Gelah ngawan ni perpulungen :

Meteh uga Jusuf si terandalken ibas kegeluhenna

Tetap nggeluh terandalken ibas kai-kai pe si mehuli 

1. Jusuf idayaken senina-seninana ku Mesir, ras jadi si erdahin Potifar, kepala pengawal istana Firaun. Si luar biasa, enggo pe idayaken, ras i negeri kalak, bahkan jadi sekalak pembantu, Tuhan tetap ngarak-ngarak Jusuf, e maka kai pe si idahikenna mehuli jadina. Labo terjeng je saja, isuruhna Jusuf guna ngurus rumahna ras kerina ertana. Iendesken Potifar kai pe man Jusuf, janah la nai kai pe lit man ukurenna, seakatan man saja. Sebage sekalak si erdahin, Jusuf dapat diandalkan. Si e kerina erkiteken kiniteken Jusuf man Tuhan ras teridah arah kerina pengkebet geluhna. Ras memang enggo terbukti, i ja lit godaan arah ndehara bosna sendiri, Jusuf tetap ngasup ngkuasai dirina. Ndehara Potifar memutarbaliken fakta, seh akhirna Jusuf itamaken Potifar ku penjara.
2. Mulihi, ipenjara pe Tuhan tetap ngarak-ngarak Jusuf. E maka ngena ate penjaga rumah tutupen e man Jusup. Isuruhna Jusup ngurus kerina kalak tutupen si deban, janah iendeskenna man bana kerina tanggung jawab kerna kai si ilakoken i bas rumah tutupen e. Si njaga penjara e lanai perlu mperdiateken kasa kai dahin si iendeskenna ku bas tanggung jawab Jusup. Janah erkiteken TUHAN si ngarak-ngarak Jusup, kasa kai si idahikenna jore kerina.
3. Dapat diandalkan, dapat juga diartikan: “bermutu, dapat dipertanggungjawabkan kebenarannya, dapat dipercaya” (KBBI). Ras karakter si e si lit bas Jusuf, subuk sanga ia i rumah Potifar sebage si erdahinna, bage pe paksa ia i bas tahanen (tutupen tahanen raja, e me tingkat tahanen si termasuk ingan kalak si ndatken ukumen si mbelin, bdk. 40:3). Ope Jusuf ibere kepercayaan guna ngurus rumahna ras kerina erta Potifar, banci jadi dahin si kitik lebe ipercayaken Potifar man bana. Tapi kenca reh dekahna, reh sikapna idah Potifar ndahin Jusuf maka kerina enggo iendesken Potifar man Jusuf. Bage pe tupung ia i tutupen, ngena ate penjaga rumah tutupen man Jusuf, banci jadi erkitken sikapna si mehuli, patuh, rajin, ras bertanggung jawab. Bahkan kedungenna, isuruhna Jusuf ngurus kerina kalak tutupen si deban. Padahal ia sendiri pe kalak tutupen kang. Janah iendesken kepala penjaga rumah tutupen e kerina tanggung jawab kerna kai dahin si iendeskenna ku bas tanggung jawab Jusuf. Seh penjaga rumah tutupen e la perlu memeriksa, mperdiateken, mengontrol kai si idahiken Jusuf, erkiteken enggo beresna kai pe si idahiken Jusuf.
4. Lit tipe bas kita, isuruh lebe maka bergerak, la lit inisiatifna. Lit ka tipe, arus ikontrol, idampingi bos/kepala maka banci beres dahinna. Tapi adi la je si mandorisa, banci asal-asalen dahinna, meros, kurang disiplin, janah hasilna pe banci la maksimal. Lit ka tipe, bertanggung jawab, jujur, disiplin, dapat dipercaya tapi tidak bertahan lama (la konsisten). Tupung idahna teremen kalak la bage isekelewetna, ia kecewa ras akhirna terbawa arus ka. Lit deba bagi Jusuf, setia, dapat dipercaya, bertanggung jawab, jujur, la nggit mengecewaken tuanna amin sekali mbue godaan man bana, dingen la perlu idampingi/ikontrol terus- menerus. Sabab ia mampu bertanggung jawab nandangi dirina sendiri. Si e kerina erkiteken mbiaren ia man Tuhan asangken man manusia. Kinitekenna man Tuhan, keleng atena man Tuhan bahan bana bertanggung jawab ia i bas kai pe si idahikenna. Ras terbukti kalak si tetap mengandalken Tuhan, geluhna ipasu-pasu Tuhan, kai pe si idahikenna pasti berhasil. Erkiteken Tuhan si ngarak-ngarak Jusuf, kasa kai si idahikenna, jore kerina.
5. Mari kita bercermin kepada Jusuf, sabab mbue tanggung jawab si ibereken Tuhan man banta. Ibas pendahinta, apakah kita dapat diandalkan? Ibas jabu, sebage orang tua, sebage perbulangen, ndehara, apakah enggo kita terandalken? Bage pe ibas gereja Tuhan, ibereken Tuhan sada kepercayaan si luar biasa man banta sebage serayanNa, enggo me kita terandalken? Perenungen man banta kerina, gelah terulin sikapta, perbahanenta, karakterta. Bangga Tuhan arah kai si nilakoken kita.