BIMBINGEN PJJ 19 - 25 Februari 2017

BIMBINGEN PJJ 19 - 25 Februari 2017

DIBATA SI KUTANDAI

Johanes 4 : 21 – 26, 34

Pdt. Maria E br Sitepu

                         

-          Penjelasen Teks (Johanes 4 : 21-26,34)

Bagin enda nuriken erkiteken percakapen Yesus raja sekalak perempuan samaria. Menarik situhunna percakapen enda adi siidah ibas ayat 1 nari, gelah tuhu-tuhu tangkas kai situhunna alasan maka lit percakapen ibas bahannta enda.

Adi siperdiateken :

1.      Ayat 9, ija siidah uga kiniteruken ukur sekalak diberu Samaria nandangi Yesus.

2.      Ayat 15, cidahken ketedehen ate sekalak Diberu samaria guna datken lau si la erbahan muas. Gambaran enda situhunna nuriken uga adi kita kalak si nggit nandai Dibata harus lit kininggiten bas dirinta nari. 

3.      Ayat 17, idah je kejujuren sekalak Diberu samaria

4.      Ayat 19, pengakun sekalak diberu samaria bahwa Yesus eme sekalak nabi.

5.      Ayat 25, tuhu ka teridah kininggiten Diberu samaria enda guna nandai ise kin Dibata e. 

Emakana labo si lepaskan peranan Tuhan Yesus ibas bahan enda, tapi si menarikna kal ibas bahan enda eme diberu Samaria, si lenga bo nandai ise kin Dibata enda, tapi arah bahasana teridah uga ia merhat guna metehsa hal si e kerina. Emakana adi siperdiateken bahannta ibas ayat 26, siidah uga Yesus nuriken ise kin Ia. 

-          Aplikasi

Kata kunci situhunna ibas bahan PJJnta ibas minggu enda eme ibas ayat 26, erkiteken ibas ayat 26 je siidah Tuhan Yesus nuriken ise kin situhunna Ia. Hal sienda tentuna ibas kitab injil jarang kal siidah Tuhan nuriken ise dirina man kalak sideban. Tentuna pasti lit alasan Yesus nuriken ise ia.

Tema PJJnta ibas minggu enda eme Dibata si kutandai. Adi ngerana erkiteken tema enda,  situhunna adi zaman gundari lanai mesera erkiteken nggo lit pustaka si nuriken tangkas kal man kita ise kin Dibata si sembah kita enda. Tapi ibas zaman mbarenda ntah pe ibas konteks pengogennta, tentuna ngerana masalah Dibata pasti melala persepsi, tapi si paling penting si cidahken diberu samaria enda eme, kepeken guna nandai Dibata :

1. Kejujuran
2. Kininggiten
3. Pengakun
4. Ras pengendesen diri

Adi 4 hal enda saja si lakoken, maka tangkas bas kita tuhu-tuhu uga kin Dibata si tandai kita sedekah enda. Gundari adi aku isungkun perlu kal kita nandai Dibata enda, erkiteken zaman gundari melala dibata-dibata sideban si mengklaim dirina eme dibata. Hal si enda me si erbahanca kita perlu megermet gelah ula kita salah ibas penandainta.