Bimbingen PJJ Tgl. 9 - 15 Agustus 2015

BIMBINGEN PJJ TGL. 9 - 15 AGUSTUS 2015

Pdt. Larena br. Sinuhadji

Ogen :

Roma 13:1-7

Tema :

WARGA NEGARA SI PAYO

Tujun :

Gelah ngawan ni perpulungen :

1) Ngangkai tugas ras tanggungjawabna sebage warga negara

2) Ngidah maka ndukung program pemerentah merupaken tanggung jawab kalak si erkiniteken

Penjelasen Bahan Pustaka Si Badia

I bas perikop enda Paulus menegasken maka perpulungen kalak si tek arus patuh man pemerentah si erkuasa, sabab pemerentah e rehna i bas Dibata nari ras itetapken Dibata. Pemerentah e me kap persuruhen Dibata si erdahin guna kiniulin rayatna. Kepatuhenta man pemerentah labo erkiteken kita mbiar kena ukumen tapi erkiteken pusuh peratenta si nuruh kita. Kebalikenna, kalak si ngelawan pemerentah si lit, seri ertina ilawanna Dibata, ngelawan si enggo itetapken Dibata. Ngelawan pemerentah ertina ilegina ukumen nandangi dirina.

I bas kai si enggo ituriken Paulus maka teridah lit kerjasama si mehuli si arus ibangun i bas pemerentah ras masyarakat. Pemerintah e me kap persuruhen entah pe wakil i bas Dibata nari si erdahin guna kiniulin masyarakat, e maka kai pe programna arus dalam rangka mensejahterakan rayat. I bas dampar si deban, masyarakat arus mendukung, bekerjasama, patuh, la erbahan jahat, la ngelawan ras tetap erbahan si mehuli man pemerentah.

Aplikasi

Arah bahan PJJ-nta sekali enda mulihi isingetken banta kerna tugas ras tanggungjawabta sebagai warga negara si mehuli. Kepatuhenta man pemerentah arus siwujudnyataken alu erbage-bage hal: membayar pajak, mendukung program pemerentahta benaken lingkungen si kitikna (RT, RW, Kelurahan, Kecamatan, Kabupaten, dll.) seh ku tingkat pusat, muat bagin kita jadi pelaku keadilen, perdamen. Tapi terkadang si muncul, kita enggo apatis nandangi program-program pemerentahta, lebih kita ngukurken dirinta/keluarganta saja, erkiteken melala siidah praktek-praktek si la mehuli si idalanken pemimpin-pemimpin negaranta. I ja ia sendiri labo jadi contoh si mehuli: korupsi, penyalahgunaan kekuasaan, penindasan, rsd. Amin bage gia, rikutken bahanta sekali enda, tugasta guna bekerjasama ras pemerentah sekaligus adi lit hal-hal si la mehuli silakokenna tugasta ka guna mpersingetisa.