Bimbingen Khotbah Minggu 16 Agustus 2015

BIMBINGEN KHOTBAH MINGGU 16 AGUSTUS 2015

Minggu Peringeten HUT RI 70 Tahun

Pdt. Larena br. Sinuhadji (Nd. Reynard Tarigan)

Invocatio :

“Erkiteken si e turikenlah katangKu enda man kalak Israel: Aku kap TUHAN; Kuselamatken ateKu kam janah Kubebasken kam i bas perbudaken kalak Mesir nari. Kudadaken tanKu si megegeh nehken ukumen si mesangat man bana, janah Kuselamatken kam. Kujadiken kam jadi bangsangKu janah Aku jadi Dibatandu. Itandaindu nge pagi maka Aku kap TUHAN Dibatandu, kenca Kubebasken kam i bas perbudaken i taneh Mesir nari.Kutaruhken ateKu kam ku taneh si enggo Kupadanken man Abraham, Isak ras Jakup; janah Kubereken denggo taneh e jadi si kerajangenndu. Aku kap TUHAN” (Keluaren 6:6-8)

Ogen :

Keluaren 15:19-21 (Tunggal)

Khotbah :

Roma 8;18-25 9 (Anthiponal)

Tema :

IMERDEKAKEN GUNA MEMERDEKAKEN

Penjelasen Bahan Pustaka Si Badia

Bahan pengogenta si pemena ngerana kerna ende-enden Miriam si iangkatkenna erkiteken kelepasen bangsa Israel i bas Mesir nari. Bangsa Israel terus iayak-ayak raja Firaun ras tentera perangna, janah arah lebena lawit merah menghadang. Tapi Tuhan alu kuasaNa mereken dalan pulah. Ipepinter Musa tanna i babao lawit, kenca bage ipesurut Tuhan lawit e alu angin timur si megegeh. Lawit ndai enggo erbelah, e maka salih ibahanna lawit e jadi taneh kerah. Arah si e me bangsa Israel endalan ngepari lawit ras selamat. Sedangken bangsa Mesir si ngayaki bangsa Israel tiba waktuna ibahan Tuhan gedap erkiteken ersada mulihken lau ndai. Alu matana jine idah bangsa Israel kuga belinna gegeh ras kuasa Tuhan i bas naluken kalak Mesir, e maka tek ia kerina man Tuhan. Kemenangen si enggo ibahan Tuhan erbahanca alu spontan nabiah Miriam turang Musa ras Harun muat gendangna je nari kerina diberu-diberu ngikutken ia, ergendang janahna landek. Ipujina ras isembahna Tuhan si enggo mereken kemenangen man bangsa Israel.

Bahan khotbahta ngerana kerna pengharapen anak-anak Dibata. Kenca iterangken Rasul Paulus nggeluh rikutkenken aturen Kesah si Badia, maka i jenda Rasul Paulus nerangkenca maka kalak si geluhna ipimpin Kesah si Badia, tetap bas ia lit pengarapen seh ku ujung geluhna, terlebih i bas ngalaken kiniseran. I bas ay. 18, Rasul Paulus ngatakenca maka kiniseran si inanami kita genduari labo kai kel pe adi ibandingken ras kemalemen ate si pagin ipetangkas Dibata man banta. I bas kita ngenanami kiniseran e, labo hanya kita fokus nandangi penderitaan si ialami kita, tapi lebih ku Tuhan si enggo leben ngenanami kiniseran erkiteken kita, ras gegeh kuasa Kesah si Badia si tetap nemani geluhta. Paulus sendiri enggo ialamina, maka i bas ia ngalaken erbage-bage kiniseran i bas nehken Berita si Meriah tetap ia bersukacita ras erpengarapen. Nina, “Enggo kupala-palai asa ngasupku i bas perlumbaan e, enggo seh aku ku garis batas, janah enggo kucikep kiniteken e. E maka gundari enggo sikap pemere kemenagen e guna iendesken man bangku.” Tek kel Paulus maka kiniseran si ialamina erkiteken ia pengikut Kristus erbuahken si mehuli, i ja enggo isikapken Dibata rudang-rudang tanda kemenangen e man bana. Kerina si enggo ijadiken Dibata ertima-tima alu ate metedeh ndigan Dibata mpetangkas kemulian anak-anakna. Ertina, enda sada jaminen ras kepastin, maka Dibata alu perkuah ateNa mereken kemulian man anak-anakNa erkiteken pengorbanen Jesus Kristus. Dosa erbanca manusia ras mahluk si deban nggeluh i bas kesia-sian, janah si e jadi erkiteken bage me sura-sura Dibata. Gelah tangkas man manusia, adi geluh sirang ras Dibata si terjadi e me kesia-sian.  

Paulus menegasken, maka i bas sada paksa waktu ibebasken Dibata me kerina si enggo ijadikenNa (manusia ras kerina si nasa lit), la nari nggeluh i bas perbudaken, tapi ngenanami kebebasen dingen kemulian ras kerina anak-anak Dibata. Tapi ope si e, doni enda termasuk kita anak-anak Dibata, si enggo ngaloken Kesah selaku jaminen kegeluhenta, kelsehen i bas nimai Dibata ndungi pengangkatennta jadi anak-anakNa, e me nebusi badanta. Gambaren si ipakeken Paulus bagi sekalak pernanden si nandangi mupus, si mengalami penderitaan ope persalinen. Alu bage jelas, geluh sebage kalak Kristen kita nggeluh i bas dua dunia, e me kap doni si genduari inganta tading si fana ras doni kekekalan. Nggeluh sebage warga negara si ituntut ertanggung jawab sebage warga negara si memiliki prespektif surgawi. Ertina, aminna pe kita nggeluh i doni enda, tapi la banci kita serupa ras doni enda. Tanggung jawabta selaku kalak si tek arus nerangi ras nirai doni inganta tading. E maka gelah tetap kita menang ngalaken erbage-bage tantangen i bas kegeluhen enda seh Dibata mereken kemulian banta i bas wari pengangkaten pagin, tetap sitimai alu erpengarapen. Alu dem kesabaren, kerja keras, siisi kegeluhenta alu hal-hal si positif, si membangun dirinta bage pe kalak si deban.

Aplikasi

Adi ngerana kita kerna kemerdekaan, kebebasen e me hak setiap pribadi, setiap bangsa (Isi Pembukaan UUD 45). Janah Tuhan enggo mereken kemerdekaan man banta, subuk i bas perbudaken dosa ras penjajahan bangsa asing nari. Janah genduari kita merayakan kemerdekaan Indonesia si pe-70 tahun-ken. Hal si pemena si arus silakoken kita e me tetap ngataken bujur man Tuhan Dibata. Bagi nabiah Miriam ras diberu-diberu paksa si e, iangkatkenna puji-pujian ras landek alu dem keriahen ukur. Tentu saja ngataken bujur ras muji Tuhan labo terjeng arah babahta saja tapi termasuk arah kerina perbahanenta. Ertanggung jawab kita mengisi kemerdekaan enda alu hal-hal si berguna. Imerdekaken guna memerdekaken kalak si deban. Sabab melala ka kita alu la isedari menindas, menyalahgunakan kekuasaan si lit bas kita. Si lemah imarginalken, idedeh e maka makin lemah, sedangken si megegeh iangkat-angkat seh maka reh gegehna. Kasus kekerasan man Angeline, salah sada contoh maka hak geluhna pe irampas. Kasus lumpur Lapindo si seh ngayak gundari lenga erkedungen alu mehuli, korupsi, kejahaten tetap merajalela, rsd.

Bage pe melala denga manusia si geluhna teriket ku bas hal-hal si la mehuli si naban ia: pinakit sosial masyarakat umpamana judi, narkoba, rsd. Itaban sura-sura kedagingen: materialistis, komsumtif, elem-elem, rsd. Rikutken bahan khotbahta, tetap kita erpengarapen, ula sempat bene pengarapenta erkiteken erbage-bage tantangen si lit. Kai si banci silakoken kita guna banci membebasken kalak si geluhna tertaban denga e me silakoken kita. Kemerdekaan si enggo sialoken ula sisia-siaken tapi sipergunaken alu kita erbahan si erguna sekaligus kita me terbeban memerdekakan kalak si kelsehen denga.