Bimbingen Khotbah Minggu 30 Agustus 2015

BIMBINGEN KHOTBAH MINGGU 30 AGUSTUS 2015

MINGGU BUDAYA

Pdt. Larena br. Sinuhadji (Nd. Reynard Tarigan)

Invocatio:

“Nina Dibata, "Genduari Sijadikenlah manusia si sentudu ras tempasTa, si menam seri ras Kita, gelah ikuasaina kerina nurung, perik-perik, bage pe kerina asuh-asuhen ras rubia-rubia si meliar, subuk si galang ras si kitik” (Kejadin 1:26)

Ogen:

Johanes 2:1-11 (Tunggal)

Khotbah:

Kejadin 1:26-31 (Tunggal)

Tema:

DIBATA ULU BUDAYA

Penjelasen Bahan Pustaka Si Badia

Perikopta e me kap bagin i bas Dibata nepa doni enda ras kerina termasuk manusia. Ras perikopta fokus i ja Dibata nepa manusia. Si menarik si banci siidah i jenda maka i bas Dibata nepa manusia lain ras carana nepa mahluk si deban. Adi si deban, cukup alu kataNa saja maka kerina jadi (bdk. Ay.3,6-7,9,11, rsd.). Tapi i bas Dibata nepa manusia lit i jenda percakapen, “Nina Dibata, “Genduari Sijadikenlah manusia si sentudu ras tempasTa, si menam seri ras Kita” (Ind. : “Berfirmanlah Allah: "Baiklah Kita menjadikan manusia menurut gambar dan rupa Kita”). Ertina i jenda, Dibata melibatken Malekat Serafim (bdk. Jes. 6) i bas muat keputusen i bas njadiken manusia. Gambar (tselem) ras rupa (demuth) nunjukken manusia sebage dilaki ras diberu si itepa Dibata, dingen lit tempas Dibata i bas dirina masing-masing. Alu make duana kata enda, penulis kitab Kejadin ersura-sura nehken pesan maka manusia maba kualitas Dibata i bas dirina. Manusia si maba rupa Dibata, labo Dibata si maba rupa jelma. Itepa Dibata manusia dilaki ras diberu gelah banci icidahkenna biak Dibata sue ras fungsi bage pe kodratna masing-masing si arus saling melengkapi sada ras si debanna.

Itepa Dibata manusia sentudu ras tempasNa, gelah jadi wakil Dibata entah pe mandataris Dibata guna ngusahai ras njagai doni enda. Manusia jadi si nampati Dibata i bas doni enda ras kerina tinepa Dibata si deban. Je nari ipasu-pasu Dibata manusia labo hanya guna nerusken si nursurna (berkembang biak) tapi pe guna ndemi, naluken doni enda dingen ngkuasaisa. Alu kata si deban, manusia ipasu-pasu Dibata guna membangun budaya/peradapan si mehuli. Tentu saja tugas enda labo idalanken alu erate-ate, sebab lit tempas Dibata i bas diri manusia e. Manusia enggo ibereken Dibata tanggung jawab si mbelin guna tetap ngusahakenca kai si enggo ibahan Dibata, mehuli tetap mehuli jadina. Sabab, adi sioge kitab Kejadin sada, kenca Dibata njadiken kerina sinasa lit maka ulih pendahin Dibata e mahuli (bdk. Ay.4,10,18,21,25,31). Alu bage banci ikataken, kai si enggo itepa Dibata mehuli reh ulina. Tapi erkiteken dosa, manusia la ngasup ndalanken tanggungjawab si enggo iampeken Dibata baNa. Dosa erbahanca lit kesirangen Dibata ras manusia, bage pe manusia ras manusia rikut ras tinepa Dibata si deban. Kecendrungen manusia kedungenna menghancurken, rate-ate, egois, ekploitatif, meranggap. Manusia sada ras si debanna si arusna saling melengkapi, berubah jadi saling menguasai.Tapi penebusen Jesus Kristus erbahanca tempas Dibata si enggo ceda ndai mehuli mulihken. Janah e me tugasta guna pehuliken si enggo ceda.

I bas pengogen si pemena, e me tanda sengget si pemena silakoken Tuhan Jesus i kuta Kana i bas kerja erdemu bayu. Ertina, Jesus labo hanya hadir i Sinagoge, entah pe ngajar tapi Ia pe reh ku bas acara pesta si berkaiten ras budaya kalak Jahudi paksa si e. I bas pesta e, lit kesemalen si biasa ilakoken kalak Jahudi e me kap minuman pesta alu lau anggur. Keri lau anggu si mada pesta. Tapi kehadiren Jesus tuhu-tuhu mereken solusi, iubahNa lau jadi lau anggur, janah lau anggur si ihasilken kualitasna sangat baik.

Aplikasi

Wikipedia Bahasa Indonesia ngatakenca, “Budaya adalah suatu cara hidup yang berkembang, dan dimiliki bersama oleh sebuah kelompok orang, dan diwariskan dari generasi ke generasi.” Sedangken Kamus Besar Bahasa Indonesia (KBBI) ngatakenca, “Budaya adalah pkiran, akal budi; adat istiadat, sesuatu mengenai kebudayaan yang sudah berkembang (beradab, maju); sesuatu yang sudah menjadi kebiasaan yang sudah sukar diubah.” Ertina, budaya e me kebiasan/kesemalen si enggo ndekah berlaku i tengah-tengah kelompok masyarakat, lingkungen entah pribadi. I bas tulisenna i Warta GBKP Maranatha edisi Agustus 2015, Pdt. Dr. Calvin Jawak maka Koentjaraningrat ningketken maka lit telu erbage wujud budaya, e me :

1. Wujud budaya si ideal : adat istiadat, norma, ide-ide, gagasan, nilai-nilai si ngaturken kegeluhen manusia i bas erdahin, kiniteken ras si debanna. I bas budaya Karo enda teridah arah litna aturen-aturen adat istiadat, orat nggeluh, pengajaren-pengajaren arah turi-turin, anding-andingen, rsd.
2. Wujud budaya si teridah arah perbahanen, teridah i bas pergaulen sekalak jelma ras kalak si deban i tengah-tengah masyarakat si tep-tep wari. I tengah-tengah kalak Karo enda teridah i bas pengerakut kiniersadan Merga Si Lima, rakut si telu, tutur si waluh, ras perkade-kaden sepuluh dua tambah sada. Bage pe perbahanen nandangi sangkep nggeluh: mehamat man kalimbubu, metenget ersembuyak-ersenina, ras metami man anak beru. Bage pe rebu, sumbang, rsd.
3. Wujud budaya si teridah arah barang-barang si ibahan manusia, umpamana perkakas musik, perkakas erburu, uis, teknologi, rsd.

Gerejanta e me kap gereja suku, i ja unsur-unsur budaya Karo mewarnai i bas kegeluhen gerejanta, subuk bahasa, pertuturen, budaya runggu, rsd., termasuk tetap kita melestariken kerina adat-adat benaken kegeluhen seh ku kematen. Umpamana, besur-besuri, mengket rumah, erjabu, nggalari utang adat i bas kematen, rsd. Nehken penampat alu “ngeripe” semangat bergotong royong, sisampat-sampaten i tengah-tengah sangkep geluh kalak Karo, enda salah sada budaya seri ras ajaren Pustaka si Badia. Budaya runggu, arih-arih muat si mehuli, enda pe sada hal si tetap perlu ilestariken. Uga pe beratna persoalen, adi banci kita arih-arih pasti lit dalan keluarna. Melala si mehuli, si membangun dalam rangka mpembarken Kata Dibata.

Rikutken tema : “Dibata Ulu Budaya.” Ertina, manusia si enggo ibereken Dibata perukuren, kepentaren makeken si lit bas ia guna ngukurken ras ngelakoken si mehuli guna kegeluhenna ras masyarakat sekelewetna. E maka budaya manusia, entah pe kesemalen si enggo ndekah berlaku i tengah-tengah kegeluhenta arus terus-menerus iterangi alu Kata Dibata. Kai si mehuli si sentudu ras kata Dibata, arus sipertahanken. Sedangken si ncedai arus pang kita mpelimbaruisa. Sebage contoh, i bas acara nereh empo la perlu nari isungkuni kerna ketutusenna man pasangenna, padahal enggo duana ia ipasu-pasu Dibata. Bage pe, luah si ibaba kalimbubu (lemari, kasur, rsd.), padahal si nikapkenkenca orang tua si nereh, gelah mehaga idah si nterem e. Bage pe i bas kerja erdemu bayu teridah uga maka mehaga kel pesta e, padahal realitana ngeraih entah pe dayaken sinasa lit, gelah banci mehaga idah i bas kade-kade ras si nterem. Bage pe terkadang, adi la kita megermet megati ijumpai kiniteken si ndekah (siakap kita bagin bas adat) i bas kegeluhenta selaku kalak si enggo tek. Umpamana, ndilo wari udan, niktik wari, perumah begu rsd. (bas Tata Gereja 2005-2015 bengket ku bas si la banci idalanken erkiteken berkaiten ras kiniteken si ndekah). Gereja entah kalak si tek hadir guna pang mpelimbarui budaya entah adat si la nari membangun kinitekenta.

membangun kinitekenta.