Bimbingen PJJ Tgl. 2 - 8 Agustus 2015

BIMBINGEN PJJ TGL. 2 - 8 AGUSTUS 2015

PERAWATAN INVENTARIS GEREJA

Pdt. Larena br. Sinuhadji (Nd. Reynard Tarigan)

Ogen :

Masmur 84:1-5

Tema :

KELENGILAH RUMAH PERTOTON

Tujun :

Gelah ngawan ni perpulungen :

1) Ngangkai erti ras guna Rumah Pertoton

2) Ngasup ngkelengi ras mpekena-kena kerna Rumah Pertoton ras inventarisna

Penjelasen Bahan Pustaka Si Badia

Masmur 84 enda ibere judul “Tedeh Ate Man Rumah Dibata”. Rikutken piga-piga penafsiren, maka penulis Masmur enda e me kap: 1) La itandai jelmana, tapi kemungkinen e me kap kalak si reh ku Jerusalem guna mengikuti perayaan keagamaan. 2) Bani Korah, e me kap kesusuren Lewi si secara khusus sebagai perende-rende i Bait Allah ras sebage si erjaga i bas pintun gerbang Rumah Pertoton. 3) Daud sendiri, sabab penulisen Masmur enda seri ras tulisen si deban i bas Daud nari. Adi Yohanes Calvin cenderung ngatakenca maka Masmur 84 itulis Daud, erkiteken tupung ia jadi raja, Rumah Pertoton lenga ibangun. Bait Allah ibangun ras ipebengket asum anakna Salomo jadi raja. Itulisken Daud maka la akapna metunggung tading bas istana si mejile tapi Dibata sendiri lenga lit rumahNa. Masmur enda itulis ope Bait Tuhan i Jerusalem lit ras kedungenna iendeken i bas perayaan-perayaan keagamaan (Nyanyian Ziarah, Nangkeng-nangkeng ku Bukit Sion, Ndahi Rumah Tuhan).

Icidahken Pemasmur maka keleng kel atena Rumah Tuhan ras merincuh ia reh ku Rumah Tuhan si Badia. Tedeh kel atena Rumah Tuhan e, seh makana tendi ras dagingna pe ikut ersurak-surak nandangi Tuhan (Bhs. Ind. : “Jiwaku hancur karena merindukan pelataran-pelataran Tuhan, hatiku dan dagingku bersorak-sorai kepada Allah yang hidup”). Ertina secara totalitas, keseluruhen kegeluhennta ermeriah ukur i bas banci jumpa ras rembak ras Tuhan. Jiwana si hancur icidahken arah erbage-bage gambaren, i ja perik tuan lit rumahna, kalimpines enggo dat asar. Sedangken manusia si itepa guna muji ras muliaken Tuhan lenga lit inganNa si khusus guna banci ersembah man Tuhan. E maka i bas pengakun Pemasmur, seh kel sangapna kalak si tading i RumahNa si Badia, banci ia lalap rende muji Tuhan.

Tedeh ate man Rumah Tuhan, nuduhken ketedehen ate guna tetap rembak ras Tuhan. Walau pe kerembaken ras Tuhan banci ialami i bas kerina dampar kegeluhenta, tapi Dibata enggo menentuken sada ingan si khusus, guna banci umatNa nggejapken persadaan ras Tuhan secara pribadi bage pe ras teman-teman sada kiniteken. Keriahen ukur si sialami Pemasmur labo tergantung ku bas gedung tapi memang puas kel akapna banci jumpa ras rembak ras Dibata. Tambah gegehna (ay. 6, 8), janah ope erdalen ku Rumah Tuhan pe, enggo ipasu-pasu Tuhan kegeluhenna (ay.7).

Pengkenaina

Engkelengi Rumah Pertoton labo terjeng mbagun alu megah ras mejile tapi perlu ka siukurken aspek kenyamanan, kebersihen, kebadianna. Bahan min Rumah Pertoton enggo jadi ingan si menimbulken efek ketergantungen man kerina perpulungen, erkiteken puas ras malem kel atena i bas ia reh ku Rumah Pertoton. E maka perlu iukurken soal penataan bagian dalam (interior), sound system, kerina perlengkapen guna kelancaren i bas ibadah, termasuk kerina si muat bagin guna melayani arus ersikap. Kebersihen gerejanta sekaligus perawaten barang-barang inventaris gereja perlu kel itingkatken. Meneladani kai si ilakoken bangsa Israel nandangi kerina alat-alat si ipake i bas Bait Allah, tuhu-tuhu iperdiateken ras irawat, janah ikataken pe badia. Mpekena-kena Rumah Pertoton labo hanya tugas Koster Gereja tapi kerina kalak si erkiniteken ertanggungjawab guna kenyamanen ersembah man Tuhan.