Bimbingen PJJ Tgl. 19 - 25 Juli 2015

BIMBINGEN PJJ TGL. 19 - 25 JULI 2015

(74 TAHUN GBKP NJAYO)

Pdt. Larena br. Sinuhadji (Nd. Reynard Tarigan)

Ogen :

2 Timotius 2:1-7

Tema :

GEREJA SI DEWASA

Tujun :

Gelah ngawan ni perpulungen

1) Seh ku bas kedewasaan kiniteken Timotius

2) Nggit erproses dingen tetap ipelimbarui i bas kerina dampar kegeluhenna

Penjelesan Bahan Pustaka Si Badia

Surat Paulus man Timotius merupaken kata ajar selaku ia kalak si nguda denga si jadi teman dingen pembantu Paulus i bas ndahiken dahin pelayanen. Timotius inasehati ras iajuk gelah tutus ersaksi guna Jesus Kristus. Janah i bas perikop enda pe mulihi ipersingeti Paulus kerna hal-hal si mehuli si arus idalanken Timotius, antara lain :

• Tetap mengandalken Tuhan i bas kegeluhenna. Paulus sendiri ngatakenca, maka lias ate Dibata si tetap mpegegehi Timotius. Piga-piga kali i bas tulisenna, Paulus ngatakenca i bas gegehna si kurang i je sampur gegeh Tuhan nampati. Megegeh kita erkiteken persadanta ras Tuhan.
• Ipindoken Paulus gelah i bas pelayanenna pe, Timotius memberdayaken enterem kalak. Kai si enggo ipelajarina, idatna arah Paulus rutang pusuhna guna mbagikenca ka man kalak si deban. Tapi man kalak si kin ertanggungjawab ras lit kemampuanna guna ngajarkenca man kalak si deban.
• Timotius ipindoken gelah ikut muat bagin i bas kiniseran jadi laskar Jesus Kristus si tutus. Sekalak laskar (tentera) si fokus i bas tugas si iembanna. Gambaren si deban pe ipake Paulus sebage kalak si ikut i bas perlumbaan, i ja arus patuh nandangi peraturen-peraturen si lit, nggit berlatih. Bage pe sebage perjuma si arus bekerja keras ras sabar seh nimai asilna.

Aplikasi

I bas Tgl. 23 Juli enda GBKP njayo 74 tahun. Tentuna enggo melala siidah perkembangenna subuk secara kuantitas ras kualitas. Enggo lit 22 Klasis (Sidang Sinode April si lepas enggo iputusken 5 Klasis imekarken), 533 Runggun, ras kurang lebih 304.901 jumlah anggotana. Kehadiren gerejanta enggo ernanam arah kehadiren CUM, BPR, TK/PAUD, PARPEM (Yayasan Ate Keleng) alu program pengairan, listrik, pendampingan hukum man masyarakat, YAPOS, PAK GElORA KASIH, YKPC Alpha Omega, bage pe gundari nampati ras ndampingi korban erupsi Sinabung ras melala denga si deban. Tentuna melala denga si perlu ipekena selaku ateta jadi gereja si dewasa. Rikutken bahanta lit hal-hal si perlu man usihen arah kai si enggo ilumbaken Paulus man Timotius. Gereja subuk secara organisasi ras pribadi arus tetap membangun kiniersadan ras Kristus.

Gereja si dewasa e me kap gereja si nggejapken la lit kepentaren, kengasupenna guna ndalanken misi i bas Tuhan nari adi la ernalem man Tuhan.

Gereja si dewasa, e me kap gereja si banci memberdayaken kerina anggota perpulungenna guna ikut muat bagin i bas membangun Kula ni Kristus. Pembinaan anggota perpulungen arah pelajaren ngawan, pembinaan-pembinaa si lit (PA, PJJ, Kotbah Minggu) perlu terus itingkatken gelah perpulungen pe dewasa i bas kinitekenna ras la murah terpengaruh i bas ajaren-ajaren si sesat. Erbage-bage talenta, profesi bas perpulungen (Psikolog, Dokter, Guru, Pengusaha, Ahli Hukum, Ekonom, rsd.), si banci terlibat i bas membagun perpulungen. Lit gereja si enggo lit klinikna, i ja tiap Minggu perpulungen si berprofesi i bas bidang medis ertugas secara ergiliren mbagiken talentana. Lit gereja si enggo lit lembaga bantuan hukumna.

Gereja si dewasa e me kap gereja si ngasup ngalaken erbage-bage tantangen, labo lari i bas persoalen. E maka tetap ilumbaken man perpulungen gelah tetap tutus sebage pengikut Kristus, desken prajurit, perjuma entah pe si ikut perlumbaan. Gereja (perpulungen) arus militan (sungguh-sungguh) sebage pengikut Kristus. Kiniseran erkiteken sebage pengikut Kristus mabai perpulungen semakin teruji kinitekenna. Megenggeng, sabar i bas ngalaken kiniseran e me kap tanda kedewasaan gereja.

kita makeken si lit bas kita.