Bimbingen Khotbah Minggu 26 Juli 2015

BIMBINGEN KHOTBAH MINGGU 26 JULI 2015

Pdt. Larena br. Sinuhadji (Nd. Reynard Tarigan)

Invocatio :

“Ngaloi tuan e, “Mehuli kal perbahanenndu e. Kam juak-juak si tutus dingen bujur; tutus atendu i bas si kitik, perbahan si e kupercayaken man bandu si terbelinen. Mari bengketlah kam ku bas, ersenang-senang ras aku.” (Matius 25:21)

Ogen :

Matius 25:14-30 (Tunggal)

Khotbah :

1 Tesalonika 1:1-10 (Tunggal)

Tema :

KUPAKEKEN SI LIT BAS AKU

Penjelasen Bahan Pustaka Si Badia

Bahan khotbahta ngerana kerna pujin si isehken Paulus nandangi perpulungen Tesalonika. Perpulungen si ncidahken buah kinitekenna arah pemberitaan Firman Tuhan si enggo ilumbaken Paulus ndube. Piga-piga hal si nggeluh i bas perpulungen Tesalonika si banci siidah kita :

• Perpulungen Tesalonika tetap ukurna i bas erpengarapen man Tuhan. Aminna melala kiniseran si inanami perpulungen e tapi tetap ialokenna Berita Si Meriah alu sada keriahen si rehna i bas Kesah si Badia nari (Bdk. Perb. Rasul 17:5-9)
• Ncidahken kinitekenna arah perbahanen, i ja perpulungen enda enggo jadi usihen nandangi kerina kalak si tek si ringan i daerah Makedonia ras Akaya, bahkan ku daerah si deban.
• Itadingkenna sembah-sembahenna ras isembahna Dibata i bas Yesus alu tutus.
• Perpulungen Tesalonika si dem alu kekelengen ras kepedulian, i ja sikap i bas ngalo-ngalo Perberita si Meriah. Sada hal si luar biasa i bas kita banci ngalo-ngalo kalak kesilang ku perpulungenta entah jabunta. Enggo pasti adi lit kalak kesilang, lit i je pengorbanen subuk waktu, tenaga, materi, perasaan, rsd.
• Perpulungen enda setia i bas nimai kerehen Jesus peduakaliken alu tetap erbahan si mehuli si ngena ate Dibata.

Bage pe i bas pengogen si pemena e me kap kerna perumpamaan kerna telu kalak juak-juak, si ibereken tuanna erta-ertana gelah ipokokken juak-juak e. Sekalak-sekalak iberekenna rikutken kengasupen juak-juak e. Deba iberekenna 5 talenta, 2 talenta ras sekalak nari 1 talenta. Juak-juak si iberken 5 ras 2 talenta minter ilipatgandakenna alu ia erbahan usaha. Sedangken si 1 talenta, ibunikenna saja duit tuanna ndai. Kedungenna, juak-juak si ndatken 5 ras 2 talenta ipujiken tuanna kenca enggo ia mulih. Labo hasilna ipujikenna, tapi i bas ia banci mpertangungjawabken duit si enggo ibereken tuanna ndai. Teridah maka duana juak-juak enda, e me kap juak-juak si tutus, mejingkat, mehuli dingen bujur. Erkiteken tutus kalak enda i bas hal si kitik maka ipercayaken man tuanna ka si terbeliden. Sedangken juak-juak si ibereken sada talenta, lenga pe isungkun tuanna enggo leben ia mandangi tuanna, ibahanna lebe alasenna engkai makana la iusahakenna duit si enggo ibereken tuanna ndai. Merawa tuanna enda ndai, sabab ia juak-juak si jahat ras pekisat. E maka iukum me juak-juak enda ndai, i ja isampetken ku bas ingan si gelap: i ja tangis me ia dingen mesui kel atena. Arah perumpamaan enda, ate Tuhan Jesus mpersingeti kita, maka arus ngasup kita menata- kelola, ngusahakenca, ertanggung jawab arah kai pe si lit bas kita.

Aplikasi

Setiap kita enggo ibereken Dibata erbage-bage si mehuli, talenta, gegeh, kesehaten, kiniliten si banci sipakeken guna membangun dirinta bage pe kalak si deban. Labo penting buena ras hebatna si lit bas kita, tapi uga banci kita menatalayankenca ras makekenca gelah erguna. Sabab melala pe pemere Tuhan e man banta adi la ernanam man kalak si deban la lit ertina. Siusih Paulus ras tim (Silas ras Timotius) si enggo makeken pemere si enggo ibereken Dibata man bana i bas nehken Berita si Meriah alu dem ketutusen, bage pe kegeluhen kalak enda jadi usihen man perpulungen Tesalonika. Bage pe erlajar kita arah perpulungen Tesalonika si tuhu-tuhu tutus i bas kinitekenna, i ja buah kinitekenna teridah man kalak si deban, nehken penampat man tim Paulus ras kegeluhen perpulungen e jadi usihen man perpulungen si deban. Bujur sikataken man Tuhan, sedekah enda gerejanta Runggun Batam Centre enggo rusur jadi ingan kesilang perpulungen si reh i bas ingan si deban nari. I bas si e pe, gerejanta enggo jadi berkat man perpulungen si deban. Ke depan perlu sitingkatken pelayanenta guna banci kita makeken si lit bas kita.