Bimbingen Khotbah Minggu 19 Juli 2015

BIMBINGEN KHOTBAH MINGGU 19 JULI 2015

Pdt. Larena br. Sinuhadji (Nd. Reynard Tarigan)

Invocatio:

Enggo isuanken kami benih pertendin ibas kegeluhenndu (I Korinti 9:11a)

Ogen:

Perbahanen Rasul 2:42-47 (Tunggal)

Khotbah:

Roma 15:25-27 & Efesus 4:9-16 (Tunggal)

Tema:

NJAYO RAS ERTANGGUNGJABAB I BAS NEHKEN SI MEHULI

Penjelasen Bahan Pustaka Si Badia

I bas suratna man perpulungen Roma, isingetken Paulus mulihi kerna sura-surana ku Roma. Tapi rusur lit abatna erkiteken la erngadi-ngadi Paulus i bas nehken berita si meriah ku daerah-daerah si lenga pernah begina kerna Jesus Kristus. Janah i bas perikop enda pe isingetkenna berkat atena ku Jerusalem guna nehken penampat arah perpulungen si lit i propinsi Makedoni ras Akaya (bdk. 2 Kor. 8). Ertina, pelayanen si sedekah enda enggo idalanken Paulus erbuah arah litna ukur ersuruh i bas perpulungen guna nggeluh sisampat-sampaten. Perpulungen enda ersada arih guna nampati si musil i tengah-tengah perpulungen i Jerusalem. Suku si berbeda la nari jadi penghalang i bas nehken kekelengen (non-Jahudi - Jahudi). Maka i bas ay. 27 jelas ikataken Paulus i bas kekelengen si ibereken kalak Makedonia ras Akaya itetapkenna alu ukur meriah. Rutang ukurna guna nampati kalak musil, sabab perpulungen enda sendiri enggo nggejapken kekelengen sialokenna arah kalak Jahudi. Enggo itandaina Jesus Kristus, enggo isehken Paulus ras teman-temanna keperlun pertendin kalak non-Jahudi enda seh makana rutang ka ia nampati keperlun jasmani kalak Jahudi.

Adi siidah i bas pelayanen Paulus i tengah-tengah perpulungen Epesus, maka piga-piga dahin khusus pelayan Tuhan e me kap: Rasul, Nabi, Perberita si Mehuli, si Mpermakani Perpulungen ras Guru-guru. Ertina, tugas ras tanggung jawab e idalanken ras-ras gelah perpulungen pe siap guna ikut muat bagin i bas membangun kula (tubuh) Kristus. Perpulungen lebe iperlengkapi, alu kebenaren Kata Dibata, gelah ia pe semakin dewasa. Jemaat si dewasa, ertina enggo ietehna tanggung jawabna, labo terjeng hak ngenca ipindokenna, tapi iberekenna dirina guna melayani sada ras si debanna. Selain si e, jemaat pe la nari murah ijola-joleken alu pengajaren kalak penipu entah pe papak.

Adi siidah i bas bahan pengogen si pemena, maka luar biasa dahin Kesah si Badia si nampati Rasul-rasul Tuhan i bas nehken Berita si Meriah ras membangun perpulungen si pemena. Perpulungen e tutus megiken Kata Dibata si nisehken Rasul-rasul dingen nggeluh sikeleng-kelengen bagi si ersenina. Firman Tuhan si enggo ibegiken perpulungen dingen penjemba Kesah si Badia mabai perpulungen icidahken buah kinitekenna. Nggeluh i bas persadan (tetap pulung ras-ras), nggeluh i bas kekelengen (idayankenna taneh ras ertana janah duitna ibagi-bagikenna sue ras keperlun sekalak-sekalak). Kegeluhen jemaat mula-mula jadi kesaksin man kalak si deban, i ja kerina kalak isekelewetna erngena ate man perpulungen e. Janah tep-tep wari itambahken Tuhan ku perpulungen e kalak si iselamatken.

Pengkenaina

Arah teluna bahan enda banci sitarik benang merahna maka berita si meriah si iberitaken mengubah perpulungen menjadi jemaat si dewasa, si ngasup ncidahken buah kinitekenna. Nggeluh sikeleng-kelengen, sisampat-sampaten dingen jadi kesaksin si mehuli man kalak si deban. Sebab melala siidah perpulungen, enggo pe ndekah jadi kalak Kristen, sura-sura hanya ilayani ras mandangi. Padahal jelas, sura-sura Tuhan i bas kita enggo iperlengkapi kita jadi jemaat si misioner, jemaat si melayani, si memberi diri guna jadi pasu-pasu (berkat) man kalak si deban. Arah erbage-bage talenta si lit bas ia, banci ipakeken guna membangun perpulungen.

I bas Tgl. 23 Juli 2015 gerejanta merayakan GBKP Njayo 74 tahun (23 Juli 1941, Sidang Sinode si pemena i Sibolangit). Tentuna paksa si e, labo ipahami i bas Kemandirian Teologi, Daya ras Dana. Tapi tantangta i bas kemandirian ngaturken perdalinen gerejanta (secara organisasi) si mencoba secara perlahan-lahan lepas i bas pengaruh Belanda (NZG). Proses kemandirian e tetap berlangsung seh gundari GBKP enggo njayo 74 tahun, tapi labo berarti GBKP berpuas diri. Pandita, Pertua, Diaken ras perpulungen ersada arih guna membangun GBKP ke depan lebih baik. SDM pelayan si arus tetap iperlengkapi gelah perpulungen pe reh dewasana. Gereja arus menjadi “penyembuh” man kalak si deban si lit bas kiniseran ras man alam semesta.