Bimbingen Khotbah Minggu 18 Januari 2015

BIMBINGEN KHOTBAH MINGGU 18 JANUARI 2015

Pdt. Larena br. Sinuhadji (Nd. Reynard Tarigan)

Introitus :

“O senina-seninangku, nginget perkuah ate Dibata si mbelin si isehkenNa man banta, kupindo man bandu: Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata sue ras biakndu selaku mahluk si rukur.” (Roma 12:1)

Ogen :

1 Samuel 3:11-20 (Tunggal)

Khotbah :

1 Korinti 6:12-20 (Responsoria)

Tema :

MULIAKENLAH TUHAN ALU KULANDU

PENGANTAR

Motto hidup seh kel pentingna lit i bas dirinta sekalak-sekalak sabab banci mpengaruhi pola pikirta, pola ucap ras pola tindakenta. Umpana lit motto sekalak anak perana, “Kecil bahagia, muda foya-foya, tua  kaya raya, mati masuk surga.” Enggo pasti adi lit kalak kalimat i datas ibahanna jadi mottona, maka geluhna santai, elakenna si berupa tantangen, ambaten ras geluhna enggo pasti ate-atena saja. Termasuk i tengah-tengah perpulungen Korinti i ja Paulus nulisken suratna. Lit motto si berkembang paksa si e, “Bebas kap aku ngelakoken kai pe.” Kebebasen si ipakena tanpa ertanggung jawab.

BAHAN KHOTBAH

I kota Korinti lit praktek peribadaten si salah e me kap seks suci si ilakoken pelacur kuil. Pelacur suci si tading bas kuil Afrodit ngelakoken percabulen dalam rangka penembahen man berhala. Bage lit na pemahaman i bas kalak Junani, maka manusia terdiri i bas tubuh, roh ras jiwa. Daging kulanta la kekal, masap, sedangken roh ras jiwa kekal, i ja kenca manusia e mate, roh ras jiwana lawes ku Dibata sedangken dagingna lesap kenca ikuburken. Pemahamen si e me erbahanca maka kula banci ipakeken guna ngelakoken kai pe, termasuk erlua-lua, sabab daging kula labo sipertanggungjawabken man Dibata.

La banci lang, pemahamen si bage pe engkenai kegeluhen kalak Kristen i kota Korinti. E maka Paulus alu tegas ngelumbakenca, “Banci jadi lit si ngatakenca, “Bebas kap aku ngelakoken kai pe.” Payo nge min, tapi labo kerina erguna. Aku pe banci nge kukataken, “Bebas kap aku ngelakoken kai pe,” tapi la kupelepas kai pe ngkuasai aku.” Prinsip i bas Paulus, kai si nilakoken kita e erguna entah lang ras la ia nggit kai pe ngkuasai ia. La ia nggit iperbudak entah pe iperhamba sesuatu hal si banci meneken ia. Ertina lit i je penguasaan diri. La nggit ia ketergantungen man sada-sada hal. Kebebasen si pahami Paulus e me bebas i bas kuasa dosa ras kematen, labo bebas ngelakoken kai pe si banci meneken kita i bas kuasa dosa. Kula manusia guna Tuhan labo guna erlagu la mehuli.

Pemahamen si peduaken si alu tangkas ilumbaken Paulus, maka kulanta enda eme Rumah Pertoton Kesah si Badia. Dirinta enda labo kita si empuna, sabab kita enggo itukur Dibata meherga kel, e me kap alu darehNa si badia. E maka arus tetap simuliaken Tuhan arah kulanta enda.

BAHAN OGEN

I bas ogenta, Tuhan ngerana man Samuel i bas pengenehenenna maka iukum Tuhan keluarga Imam Eli erkiteken dosa-dosa  si ilakoken anak-anakna man Tuhan e me kap ibuatna persembahen si kin guna Tuhan (“sitik pe la mehamat perbahanenna nandangi persembahen man TUHAN,” 2:17) ras ngelakoken perzinahan (2:22).

APLIKASI

Arus tetap nggeluh bas dirinta, maka kita enggo itebus Tuhan. Geluhta enda labo kita si empuna, tapi Tuhan. Adi nina Paulus man perpulungen Roma (introitus), arus tetap siinget perkuah ras keleng ate Tuhan si enggo iberekenNa banta secara cuma-cuma, gratis, tapi arus tetap sipertanggungjawabken. Diectrich Bonhoefer ngatakenca, “Kasih karunia Tuhan memang gratis tetapi bukan murahan,” sebab itebusNa dosa-dosanta alu darehNa si badia. Alu bage, siendesken kulanta jadi persembahen s inggeluh guna Tuhan.

Sebage kalak si tek, si enggo iselamatken Tuhan, arus tetap kita megermet kerna tawaren-tawaren doni si banci meneken kinitekenta. Kemajuan teknologi sada dampar melala hal-hal si positif si banci nampati kita, memperlengkapi kita guna maju. Tapi dampar si deban lit ka pengaruh si negatif, i ja adi la kita megegeh i bas kiniteken banci kita ndabuh ku bas dosa. Salah sadana e me kap gaya hidup hedonis, gaya hidup i ja orientasina e me kap kesenangen ras kenikmaten. Gaya hidup hedonis banci siperdiateken berkembang i bas kegeluhenta, subuk anak-anak, orang muda, bage pe orang tua. Gaya hidup instan: sura-sura berhasil tapi tanpa usaha ras perjuangen, e maka ipake jalan pintas si enggo pasti bertolak belakang ras kebenaren Firman Tuhan. Free sex. Kekerasen: tawuran antar pelajar, penyalahgunaan obat-obatan terlarang, subuk pemakai ras pengedar, rsd. Jelas adi gaya hidup si bage biasa silakoken, bahkan enggo jadi kebutuhen/ketergantungen, la nari kita mpermuliaken Tuhan i bas geluhta.

Tambahan arah serayan Tuhan si deban :

Pt. Bp. Klaudia Tarigan : Telingga, mulut, lidah, tangan, hidung arus dipergunakan u memuliaken Tuhan.