Bimbingen Khotbah Minggu 11 Januari 2015

BIMBINGEN KHOTBAH MINGGU 11 JANUARI 2015

Pdt. Larena br. Sinuhadji (Nd. Reynard Tarigan)

Introitus :

“Ngerana ka Jesus man kalak si nterem e nina,”Aku kap terang doni. Ise ngikutken Aku, ialokenna me terang si mereken kegeluhen, janah lanai ia erdalan i bas gelap.” (Johanes 8:12)

Ogen :

Markus 1:4-11 (Responsoria)

Khotbah :

Jesaya 60:1-6  (Tunggal)

Tema :

KEKEKENLAH, TERANGNDU NGGO REH

BENA KATA

Keke, bangkit, tetap iperluken i bas kegeluhenta. Sabab banci jadi mbue erbage-bage persoalen, perbeben, si erbahanca kita pesimis, kote, bene pengarapenta. Bangkitlah, kekekenlah e me kap sada kata si ibutuhken kita guna banci kita semangat i bas ngalaken erbage-bage hal i bas kegeluhenta. Ras berita enda me si ipeseh Tuhan man banta arah nabi Jesaya.

BAHAN KHOTBAH

Jesaya 60 bagian i bas Trito Jesaya (ps. 56-66), si itulisken kenca bangsa Israel mulih i bas pembuangen Babel nari. Kegelapen, kiniseran sialami bangsana (tertulis i bas ps. 59) la nari ngkuasai bangsa Israel, aminna lit denga sitik-sitik sisana (lih. Ay. 2, 12), enggo igantiken alu terang Tuhan si mpelimbarui (memulihkan) keadaan bangsa e.

Walau pe mulih i bas pembuangen nari, tetap denga erbera-bera ukur bangsa e, selain Rumah Pertoton si lenga ibangun (kenca ihancurken), situasi 70 tahun i pembuangen erbahanca kote kel bangsa e. E maka Jesaya mbenaken alu kata, “Kekekenlah” (ay. 1), kata si menyentak, si membangkitken bangsa e gelah ula iliputi kecemasan, keragu-raguan, rsd. Bangkit, kekekenlah sebab terang Tuhan, kemulian Tuhan enggo reh ras ersinalsal i babona. Bahkan bangsa-bangsa si deban, raja-raja reh ndahi terang si meliputi bangsaNa.

Pembebasen Tuhan terjadi, si itaban i Babel mulih ku Jerusalem. Terjadi perubahen si luar biasa, bangsa e iliputi sukacita. “Ngidah si e, ayondu siang perban riahna ukurndu, pusuhndu debet-debet, perban gedangna atendu.” Labo terjeng je saja, kejayaan tupung masa Salomo pe mulihi terjadi i ja kebayaken bangsa-bangsa si deban itaruhken man bangsa Israel: unta i Midian-Epa nari, emas ras kumenen i Syeba nari. Bdk. Esra 1:4-6, i ja iperentahken Raja Kores, bangsa Media mereken penampat man bangsa Israel:

1:4 BangsaNa si genduari i bas pembuangen, adi perlu penampat lako mulih, kalak si sada kuta ras ia arus mereken penampat alu mereken pirak, emas, barang-barang si deban, ras rubia-rubia guna ngangkat barang, bage pe persembahen-persembahen lako ipersembahken i Rumah Pertoton Dibata i Jerusalem." 1:5 Kenca bage pengulu-pengulu terpuk suku Juda ras Benyamin, imam-imam ras kalak Lewi, ras kalak si debanna, si pusuhna enggo ipekeke Dibata, minter ersikap gelah berkat ku Jerusalem lako majekken mulihi Rumah Pertoton TUHAN. 1:6 Kerina kalak si sada kuta ras ia nampati alu mereken peralaten pirak, emas, barang-barang si debanna, asuh-asuhen guna ngangkut barang-barang si debanna si meherga, ras persembahen-persembahen guna Rumah Pertoton

Kai si terjadi nandangi bangsa Israel e me kap erkiteken perbahanen Tuhan. Ipulihken Tuhan bangsaNa subuk secara jasmani ras rohani. Salah sada tafsiren Quest Study Bible (Zondervan, 2003, p. 1069) ngatakenca, “Sukacita, kelimpahan serta kekayaan adalah cara Tuhan yang mengherankan dalam memperlengkapi dan menopang umatNya, dalam rangka mereka pulang ke Jerusalem. Apa yang dialami bangsa Israel merupakan gambaran pulihnya kembali hubungan yang benar antara Allah dan umatNya.”

BAHAN OGEN

I bas bahan ogen Mark. 1:4-11, reh Johanes Peridiken ku taneh mesawang Judea guna mpersingeti bangsa Israel si sedekah enda terikat i bas dosa. Ilumbaken Johanes maka kerina si megiken khotbahna, guna jera ras iperidiken gelah dosa-dosana ialemi Dibata. Irespon kalak si nterem kai si iberitaken Johanes, i ja kerina jelma i taneh Judea ras Jerusalem ngakuken dosana ras iperidiken Johanes i Lau Jordan.

Johanes Peridiken si dem alu kiniterukun ukur, si mpersingeti perpulungen paksa si e, maka bakal reh sekalak si lebih erkuasa asangken ia sendiri, janah ngosari tali sepatuna pe la ia metunggung. Iletaken Johanes dirina lebih rendah asangken hamba/pelayanan.

PENGKENAINA

KEKENLAH, TERANGNDU ENGGO REH. Banci jadi pengalaman tahun 2014 si la bagi ukurta (kegagalan, kiniseran) tetap denga membelenggu kita, mengikat kita si erbahanca la kita banci semangat i bas ndalani wari-wari kegeluhenta i bas tahun si mbaru. Tetap diliputi ketakutan, kecemasan, keraguan, ketidakpastian, penyesalan akibat erbage-bage kesalahen si enggo silakoken. Firman Tuhan menyentak, membangunkan kita, “kekekenlah,” “bangunlah,” “bangkitlah.”

Tahun baru, semangat baru, pengharapan baru, sebab Tuhan Juruselamatta erkuasa ngelakoken kai pe i bas kegeluhenta (ogen). Terjadi pemulihan secara rohani ras jasmani. Meriah ukurta, semangat kita ndalani wari-wari kegeluhenta aminna lenga pasti tapi sada keyakinen bas kita, Tuhan pasti mereken si terbaik i bas kegeluhenta.

Tuhan Jesus ulu terang e enggo reh ras enggo jadi Juruselamatta. Jesus enggo mpetandaken diriNa sebage Terang Doni. Janah ise si tek dingen ngikutken Ia, ialokenna me terang si mereken kegeluhen, janah lanai ia erdalan i bas kegelapen. Ertina kita si tek man Jesus, la nari erdalan i bas kegelapen ras kegelapen la nari erkuasa i bas kegeluhenta (la nari kita merincuh nggeluh i bas dosa/gelap, walau pe banci jadi kita ndabuh ku bas perbahanen si gelap, tapi erkiteken enggo kita ikuasi Terang Tuhan, sedar ka kita mulihken).

Responta: reh kita ku Tuhan, gelah ipelimbaruiNa pusuh ras ukurta, mohon ampun i bas erbage-bage kesalahen si enggo ilakoken i bas masa-masa si lepas, dingen jera, robah, tadingken dosa e, si banci ngiket kita seh makana la semangat i bas erbahan hal-hal si mehuli si iperentahken Tuhan bas kegeluhenta.

Kegeluhenta sebage Anak-anak Terang maba terang man sekelewetta ras arah perbahanenta si mehuli terpuji gelar Dibatanta.

Piga-piga Tanggapen Arah Pt./Dk.:

Pt. Bp. Ben Ginting:

Kata Pergegeh guna ndalani kegeluhenta i bas masa yang akan datang. La nai perlu berpikir ke belakang. Penampat Tuhan e di luar akal pikirenta. Penampat e reh i bas bangsa si deban si mulihi jaya bangsa Israel. Ogen, Johanes Peridikin si meteruk ukurna i bas ngalo-ngalo Jesus.

Dk. Bp. Icha Sebayang:

Refleksi diri. Ula nari nggeluh bagi si gel-gel. Jera, dingen robah. Tadingken dosa e. Tadingken perbahanen si gelap e. Bangsa Israel akan mengalami kejayan kembali dengan catatan mau bangkit.

Pt. Bp. Velya Ginting:

Bangkitlah kita gelah teridah kemulian Tuhan i bas kegeluhenta.

Pt. Bp Joyce Sembiring:

Terang pasti membawa kebaikan. Kehadiren Jesus mereken kedamen i bas kegeluhenta. Ula kita tading i bas kegelapen. Ersinalsallah terang e si lit bas kita ku sekelewetta gelah kalak si deban banci igejapina sukacita bagi sialami kita.