Bimbingen Khotbah Minggu 18 Oktober 2015

BIMBINGEN KHOTBAH MINGGU 18 OKTOBER 2015

Pdt. Larena br. Sinuhadji (Nd. Reynard Tarigan)

Invocatio :

“Tapi kam, ntah kai gia jadi, ola bene ukurndu. Megenggenglah i bas ngenanami kiniseran. Dahikenlah dahin meritaken Berita si Meriah e, janah dalankenlah tanggungjabapndu jadi suruh-suruhen Dibata” (2 Timotius 4:5)

Ogen :

Roma 1:1-7 (Tunggal)

Khotbah :

2 Timotius 4:1-5 (Anthiponal)

Tema :

PEMBARKEN BERITA SI MERIAH

Pembahasen Bahan Pustaka Si Badia

Surat 2 Timotius enda itulisken Rasul Paulus man Timotius dalam rangka mpegegehi Timotius selaku hamba Tuhan si nguda denga sekaligus gelah tetap tutus ersaksi kerna Berita si Meriah.

Secara khusus i bas perikop enda isingetken Rasul Paulus kerna kerehen Tuhan Jesus peduakaliken guna jadi Hakim nandangi kalak si nggeluh bage pe mate. E maka ipindoken Paulus maka Timotius arus tetap pembarken Kata Dibata. Piga-piga si penting si ikataken Paulus:

• Maka pembarken Kata Dibata arus tetap ilakoken, subuk tengteng bage pe la tenteng waktuna. Ertina, setiap saat adalah kesempaten si mehuli si banci sipakeken kita guna nehken Berita si Meriah. Bahkan i bas perbeben sekali pe i je banci kita bersaksi arah ke-tegar-annta, kesabaren, ras kinigegenggenta.
• Firman Tuhan erguna i bas ngajari kerna si ngena ate Dibata, mandang si lepak, pekena si salah ras erguna i bas mereken pedah-pedah alu mehuli. I bas kita mpembarken Kata Dibata e me kap kesempaten man banta guna mengevaluasi diri, bage kalak si deban. Kata Dibata e mpelimbarui kita wari lepas wari. E maka alu dem kesabaren dingen kekelengen sipersingeti kalak i bas kesalahen si ibahanna ras mpegegehisa gelah reh paguhna kinitekenna. Tugas enda memang labo gampang, sabab banci kari nembeh ate kalak man banta. Guna si e me, tetap sipindo kepentaren i bas Dibata nari.
• Lit kari waktuna, la nari ate kalak megiken pengajaren si tuhu-tuhu, tapi idaramina guru-guru si banci ngajari kerna kai-kai si iakapna ntabeh megikenca ras turi-turin si la tuhu.  Sebage kalak si tek, kebenaren Kata Dibatalah si arus sibaba. Motivasi guru-guru e erbage-bage subuk kerna popularitas, materi. Janah erkiteken kemajuan jaman ras beratna perbeben maka manusia pe lebih memilih hal-hal si pragmatis, praktis ras si meriah-meriah saja. Alu bage, arus tetap kita kreatif, kebenaren Kata Dibata arus tetap ipembarken alu erbage-bage metode si menarik.
• Aminna mbue tantangen, ola sempat bene ukur. Megegenggenglah i bas ngenanami kiniseran. Tetap dahiken dahin meritaken Berita si Meriah ras ndalanken tanggung jawab selaku per-Berita si Meriah. Terkadang, perbeben, persoalen dalanna kita surut i bas nehken si ngena ate Dibata. Arah perbeben si lit, merupaken ujian gelah reh dewasana kinitekenna. E maka i bas si e tetap erpengendes man Tuhan, gelah kuasa Tuhan sampur i bas gegeh si kurang bage pe tetap bangun kiniersadan ras teman-teman sada kiniteken gelah banci saling menopang sada ras si debanna.

Ogennta (Roma 1:1-7) ngerana kerna kesaksin Paulus maka ia enggo ipilih Dibata jadi RasulNa guna meritaken Berita si Meriah i bas Dibata nari. Isi berita e, e me kap kerna Tuhan Jesus Kristus, Anak Dibata si tonggal. Erkiteken Kesah si Badia, maka Ia Anak Dibata si erkuasa. Hal enda teridah i bas kekeken Jesus i bas si mate nari guna nebusi dosa-dosa manusia. Erkiteken si e, Paulus ibereken Dibata hak istimewa guna meritaken Kata Dibata gelah enterem bangsa-bangsa tek dingen erkemalangen man Jesus. Arah tugas si mulia enda, Dibatalah si tetap mereken lias dingen kemalemen ateNa.

Aplikasi

Pembarken Berita si Meriah e me kap tugas si enggo ibereken Tuhan banta kalak si tek (bdk. Mat. 28:19-20, Perb. Rasul 1:8). Meritaken Kata Dibata labo hanya terjeng bas Gereja tapi i bas kerina dampar geluhta, kai pe profesinta ras erbage-bage bentuk entah pe cara. Umpamana, melalui ende-enden, lukisen, tarian, buku, keteladanan, khotbah, perbahanen si mehuli rsd. Labo hanya bersifat verbal tapi pe non-verbal, bahkan si enda banci lebih menyentuh asangken hanya melalui kata-kata tapi lenga bo tentu silakoken. Umpamana, kejujuren sesekalak i bas lingkungen si korup merupaken sada kesaksin si luar biasa asangken khotbah muluk kerna kejujuren padahal si ngkotbahkenca pe lenga bo tentu jujur. Arah gaya hidupta pe kita enggo banci naksiken kerna kuasa ras keleng ate Tuhan Jesus (sabar, meteruk ukur, empati, meriah ukur, bertanggung jawab, rajin, rsd). Sabab Jesus Kristus sendiri pe bage, kerina kegeluhenNa merupaken Berita si Meriah man kalak si lit i sekelewetna. Ertina, Jesus sendiri merupaken isi i bas Berita si Meriah si ipembarkenNa.

Firman Tuhan erkuasa guna mpelimbarui kegeluhen kalak si ngalokenca. E maka asum itegur, ikoreksi, ievaluasi, ngataken bujurlah kita dingen pindo gegeh kuasa Kesah si Badia guna banci nggeluh i bas kegeluhen si mbaru. Penalementa man Tuhan sekaligus Firman Tuhan sipake sebage pedoman kegeluhenta, nampati kita guna kritis nandangi pengajaren-pengajaren si la membangun, si hanya meritaken berita-berita si menyenangken.

Minggu Zending enda mpersingeti kita, maka meritaken Firman Tuhan (er-Marturia, Eta Erberita si Meriah), tetap arus silakoken selaku kalak si tek, sabab e perentah Tuhan Jesus man banta. Sejarah Minggu Zending e me kap berasal i bas “Zending Karo” ibenaken i bas Tgl. 26 Juli 1926 i bas masa Pdt. J. van Muylwijk. Janah Zending Karo e me kap Geraken Pekabaren Injil si ilakoken kalak Kristen Karo man masyarakat Karo. Semangat Zending Karo melahirken Asrama Diberu i Kabanjahe paksa si e, i ja nterem diberu si sekolah kuta nari, bage pe pembangunen Gereja si pemena i Kabanjahe (27 Maret 1927). Kenca si e nge maka Minggu Zending tetap ibahan sebage gerakan misioner warga gereja man masyarakat sekelewetna khususna kalak Karo ras upaya kemandirian GBKP si ibenaken i bas Tgl. 23 Juli 1941, janah terus ilakoken seh genduari (Maranatha Edisi 295, Pdt. E.P. Gintings). Eta er-Berita si Meriah seh ngayak Tuhan reh peduakaliken. Alu kata ras perbahanenta sipembarken Kata Dibata. Aminna mbue tantangen si man alanken ula sempat bene ukurta.