Bimbingen PJJ Tgl. 6 - 12 September 2015

BIMBINGEN PJJ TGL. 6 - 12 SEPTEMBER 2015

Pdt. Larena br. Sinuhadji (Nd. Reynard Tarigan)

Ogen:

Kejadin 7:1-16

Tema:

KINITEKEN RAS ILMU PENGETAHUAN TEKNOLOGI

Tujun:

Gelah ngawan ni perpulungen :

1) Meteh maka pengaruh ilmu pengetahuan ras tehnologi i bas kegeluhen (positif ras negatif)

2) Pentar makeken ilmu teknologi erpalasken Kata Dibata

PENJELASEN BAHAN PUSTAKA SI BADIA

Tuhan erkadiola njadiken manusia ras namakenca ku doni enda erkiteken kejahaten si ilakoken manusia. E maka ihancurken (isasapken) Tuhan ateNa manusia ras-ras kerina rubia-rubia. Tapi Nuah ngena ate Tuhan, sabab i bas jamanna Nuah ngenca si mehuli, ia erdalan i bas dalan Dibata. Ituriken Dibata rencanaNa guna nasapken doni enda man Nuah (Kej. 6:13), tapi ia ras keluargana (ndeharana, anak-anakna ras telu permainna) rikut ras pitu pasang rubia-rubia si la ipantangken, ras sepasang rubia si ipantangken tep-tep erbage. Bage pe perik pitu pasang tep-tep erbage. Hal enda ibahan gelah tep-tep erbage rubia-rubia ras perik-perik la lesap, janah gelah ertambah-tambah ka ia pagin i doni enda. Iperentahken Tuhan man Nuah gelah ibahanna sada kapal i bas kayu nari. Kerna modelna, gedangna, belangna, ganjangna, bahan-bahanna kerina enggo jelas ikataken Tuhan man Nuah. Janah kapal e ertingkat telu. Ilakoken Nuah kerina kai si iperentahken Dibata man bana (Kej. 6:22; 7:5). Reh udah meder empat puluh wari empat puluh berngi dekahna ku doni enda. I bas wari e me Nuah ras ndeharana rikutken ras keluargana bage pe tep-tep rubia si enggo iserapken bengket ku bas kapal e.

APLIKASI

Nuah tuhu-tuhu kalak si paguh i bas erkiniteken man Tuhan, teridah maka sekelewetna enggo ngelakoken kejahaten, tapi Nuah la terpengaruh. Ia mampu menguasai diri alu tetap erdalan i bas dalan Dibata. Bage pe ia kalak si patuh arah kai si enggo iperentahken Tuhan. Asum Tuhan mereken perentah man Nuah guna erbahan kapal guna keselamatenna ras keluargana rikut rubia-rubia si enggo iserapken, ilakoken Nuah kerina si enggo iperentahken Tuhan alu patuh.

I bas kiniteken man Tuhan, maka ibereken Tuhan ka kepentaren ras kebeluhen man Nuah ras keluargana erbahan kapal. Kuan-kuanen 1:7, “Guna ndatken pemeteh, si pemenana si la banci la lit i bas kalak e me mehamat dingen erkemalangen man TUHAN.” Kalak lenge la nggit mperdiateken kepentaren dingen la ia nggit erlajar. Nuah alu ipandu Tuhan beluh erbahan sada kapal si mbelin si merupaken sada gambaren kuga kemajuan pengetahuan ras teknologi i bas jamanna.

Patut siapresiasi, maka ilmu pengetahuan teknologi sada hal si mengutungken man manusia. I bas sada dampar, pengetahuan ras teknologi nampati proses ndatken informasi alu cepat, efisiensi waktu, tenaga, biaya, nambahi pemeteh, rsd. Ngoge Pustaka si Badia ras rende pe enggo lit aplikasi secara elektronik. Janah enggo ka mbue Gereja-gereja si make Iptek i bas ibadahna (LCD projektor, alat musik, sound system, music box, rsd.). Tapi adi la kita ngasup makesa alu mehuli banci e ncedaken kita. Adi la kita erkemalangen man Tuhan dingen la sipakeken biak Krisuts bas dirinta, ilmu pengetahuan ras teknologi banci encedai dirinta ras kalak si deban. E maka melala siidah contoh-contoh la mehuli terjadi erkiteken kemajuan tehnologi enda: kejahatan dunia maya meningkat (cyber crime), teroris si beluh merakit bom erkiteken lit petunjukna bas internet, senangen geluh sesekalak (individualis), anak-anakta si kitik denga, remaja ndabuh ku bas pergaulan bebas (seks online, judi online), keluarga hancur, rsd.

Dibatanta mereken perukuren man manusia gelah manusia banci terus berkembang, inovatif, menciptaken hal-hal si mbaru guna perdalanen geluh manusia. Tapi i bas pemeteh rikut ilmu teknologi si iciptaken manusia, arus tetap ipalasi mbiar ras malang man Dibata, gelah tetap banci sipakeken guna kiniulin kegeluhen manusia ras kemulian man Tuhan.