Bimbingen PJJ Tgl. 27 September - 3 Oktober 2015

BIMBINGEN PJJ TGL. 27 SEPT. - 3 OKT. 2015

Pdt. Larena br. Sinuhadji (Nd. Reynard Tarigan)

Ogen :

Perbahanen Rasul-Rasul 26:16-18

Tema :

ERBERITA DINGEN ERSAKSILAH

Tujun :

Gelah ngawan ni perpulungen :

1) Meteh maka Dibata enggo milih ia guna jadi saksi Kristus

2) Ngasup ndalanken pendilo Dibata guna erberita ras ersaksi kerna Kristus

Penjelasen Bahan Pustaka Si Badia

Perikopta merupaken sada rangkaian i ja Paulus mbela dirina i bas ingan persidangen i lebe-lebe raja Agripa (Herodes Agripa II menggantikan ayahnya Herodes Agripa I pada usia 17 tahun, dan sejak th. 50 M menerima wewenang yang makin luas atas seluruh wilayah Palestina. Agripa hidup bersama adiknya Bernike, setelah suaminya meninggal dunia. Hubungan mereka lebih dikenal sebagai hubungan inses). I bas kesempaten si e me ipakeken Paulus guna ia bersaksi, i ja iturikenna kerna ia jera. Maka ia enggo ibereken surat kuasa bas imam-imam si mbelin nari guna menyiksa ras namaken kalak Kristen i Damaskus ku penjara. Tapi i tengah dalen Paulus “itangkap” Tuhan. I bas perjumpanna ras Tuhan, maka Tuhan ndilo ia secara pribadi, “O, Saul, Saul engkai maka Aku isiksandu? “Ise kin kam Tuhan,” nina Paulus ngaloi. “Aku kap Jesus, si isiksandu.” E maka nina Tuhan Jesus man Paulus, maka ia enggo ipilih Tuhan secara khusus guna jadi sierdahinNa ras saksiNa. Gelah banci ituriken Paulus kai si enggo idahna i bas paksa enda bage pe gelah iturikenna kai pe si icidahken Tuhan Jesus pepagin. Tuhan mengutus Paulus secara khusus guna jadi si erdahin nandangi bangsa-bangsa si deban i luar kalak Jahudi. Tugas Paulus jelas, e me mpemedakken mata kalak si gelap denga guna bengket ku bas terang. Itadingkenna kuasa Iblis je nari reh ku Dibata. Gelah erkiteken tek ia man Jesus Kristus, ialemi Tuhan dosa-dosana ras ialokenna ingan, e me kap ingan si patut ialoken kalak si ipilih Dibata. Enda me si isaksiken Paulus man Raja Agripa ras kerina si hadir, maka i bas perbeben si ialamina pe ipakena guna ia banci ersaksi. Ertina, tugas si enggo ipercayaken Tuhan Jesus man bana asum ia “itangkap” Tuhan Jesus tetap idalankenna i ja pa pe ras i bas situasi kai pe.

Aplikasi

Tema i bas PJJ-nta “Erberita ras Ersaksilah”. Tugas erberita, ersaksi kerna kuasa ras keleng ate Jesus Kristus e labo hanya itujuken man Paulus entah pe Serayan-serayan Tuhan si idilo Tuhan secara khusus, tapi pe man banta kerina kalak si tek man baNa. Perb 1:8, “Tapi ialokenndu pagi gegeh asum Kesah si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda” (bdk. Luk. 24:47-49). Kita kalak si tek, si enggo idemi Kesah si Badia terpanggil guna erberita ras jadi saksi Tuhan i ja pa pe. Labo hanya arah kata tapi pe arah perbahanenta si tep-tep wari. Erkiteken sikap geluhta merupakan surat Kristus si banci iidah ras ioge kalak. Janah i bas konteks bangsanta si pluralis kita arus berhikmat i bas kita erberita ras ersaksi man kalak si deban. Sabab isu “Kristenisasi” banci jadi penghambat man banta guna banci kita bergaul dekat ras jadi saksi man kalak si deban. I bas si e tetap sipindo hikmat bas Tuhan nari gelah arah kata ras perbahanenta ngasup kita naksiken kuasa ras keleng ate Tuhan man kalak si deban. Benaken hal-hal si kitik: sikap ramah, rendah hati, menghargai kalak si deban, peduli, lit bas kita kekelengen (empati), rsd., si banci sibereken i bas kita bergaul ras kalak si deban, subuk i lingkungen ras inganta erdahin.

Enggo pasti, lit tantangen si man hadapen i bas kita naksiken kerna keleng ate Kristus, bagi si ialami Paulus i bas pelayanenna. Tapi i bas si e tetap kita harus megenggeng. Ibereken Tuhan tetap gegeh ras dalan pulah man kalak si tetap mengandalkan Tuhan i bas kerina dampar geluhna (Pil. 4:13).