Bimbingen Khotbah Minggu 27 September 2015

BIMBINGEN KHOTBAH MINGGU 27 SEPTEMBER 2015

Pdt. Larena br. Sinuhadji (Nd. Reynard Tarigan)

Invocatio :

“Pujilah Ia, o kam suruh-suruhen Tuhan, o kam kesusuren Jakub muliakenlah Ia. Erjimpuhlah i adep-adepNa o kam kesusuren Israel” (Masmur 22:24)

Ogen :

Perbahanen Rasul 27:1-6 (Tunggal)

Khotbah :

2 Korinti 11:23-29 (Tunggal)

Tema : ULIH LATIH SI MERDANG

Penjelasen Bahan Pustaka Si Badia

Bahan Ogen :

1. Erkiteken pengajaren si ibaba Rasul Paulus, maka melala kalak Jahudi si ngaduken ku pengadilen agama maka ajaren si ibaba Paulus ncedaken kalak Jahudi. Kenca si e maka melala persidangen si ibentasi Paulus, bahkan lit si ersura-sura munuh Paulus. Seh akhirna ipindoken Paulus sendiri maka perkarana ibaba ku pemerentah Roma.
2. I bas konteks perikopta e me kerna perdalanen Rasul Paulus menuju Roma melalui lawit. Perdalanen si cukup ndauh ras mbue risiko si ihadapina.

Bahan Khotbah :

1. Perikopta ngerana kerna kiniseran si ialami Paulus selaku Rasul Tuhan si iranguken kerasulenna erkiteken labo ia bagin i bas 12 Ajar-ajar Tuhan Jesus. Bahkan lit si ngatakenca Paulus “la sehsa”. Paulus mbela kerasulenna, sabab tangkas man bana maka ia “itangkap” secara langsung oleh Tuhan Jesus asum perdalanenna ku Damaskus guna mbunuhi kerina kalak si tek man Jesus Kristus. Ibelana kerasulenna labo guna popularitas dirina tapi guna Berita si Meriah si iberitakenna. Adi kerasulenna itolak enggo pasti Firman Tuhan si ibabana pe la ialoken kalak.
2. I jenda ituriken Paulus kerna erbage-bage kiniseran si ialamina guna nehken Berita si Meriah. Dekahen ia ipenjara, iligasi bahkan menam mate. 5 nembas ia iligasi kalak Jahudi: 1 nembas 39 kali. 3 kali igudam kalak Roma janah sekali ibenteri alu batu. 3 kali karam kapal si itumpangina, janah pernah ka 1 wari 1 berngi bombang-bombang i babo lawit. I bas perdalanenna megati ia jumpa bahaya: alam, kena rampok, erkiteken teman-teman sebangsana ras bangsa si deban nari, bahaya i bas teman si pekulah-kulahna ia kalak si erkiniteken, bahaya i kota ras i desa. Labo terjeng je saja, megati guna keperlun geluhna pe susah akapna. Megati la terpedem, muas dingen melihe, la lit si man panganenna, bergehen erkiteken kurang uis. Janah tuhu-tuhu Paulus terbeban kerna perpulungen, nandangi perpulungen si mesera kegeluhenna, nandangi perpulungen si ndabuh ku bas hal-hal si la mehuli, gara dingen ceda pusuhna.

Aplikasi

1. Serayan Tuhan e me kap kalak si idilo Tuhan secara khusus guna banci jadi perpanjangen tan Tuhan i bas meritaken Berita si Meriah. (Bdk. Yes. 6:8, Epesus 4:11), Tuhan si mereken pemere-pemere man manusia, lit deba jadi rasul, jadi nabi, perberita si mehuli, mpermakani perpulungen, guru. Ras perkembangen selanjutna, lit Pandita, Pertua, Diaken. Janah keabsahan (pengakuan secara resmi) iperluken guna banci nehken Kata Dibata i bas Gereja si mengutus. Adi Pandita melalui Sekolah Teologia, je nari pratek lapangan sebage vicariat, adi lulus banci itangkuhken jadi Pandita. Pertua ras Diaken, ipepilihken i bas perpulungen nari ras bersedia guna melayani je nari mengikuti kursus kenca si e maka itangkuhken. Artina, arus sigejapken maka banci kita ipilih ras ipake Tuhan jadi serayanNa erkiteken perkuah ateNa, labo erkiteken kebeluhenta. I bas si e patut kita ngataken bujur ras arah si e njemba kita guna melayani alu tutus.
2. Enggo pasti tantangen, rintangen, kiniseran si ialami Paulus sebagai Rasul Tuhan berbeda ras si ialami SerayanTuhan i bas paksa gundari, bage pe Penginjil-penginjil/Pendeta si tantangna melayani i bas manteki GBKP. Tapi si pasti lit tantangen si man alanken (bdk. Pilipi 3:10, “Ikut aku ngenanami kiniseranNa”. Markus 8:34 b,  “Ise atena ikut ras Aku, arus maka ipersilahangna bana, ipersanna kayu persilangna je nari ikutkenna Aku”). Arah tantangen si lit labo e erbahanca kita surut guna melayani Tuhan alu tutus, tapi sipindo gegeh man Tuhan gelah Ia mpengasup kita ngalaken erbage-bage tangtangen e. Serayan Tuhan arus tetap penalamenna man Tuhan sabab kita erdahin bas peken anggurNa.
3. Gelah tetap setia Serayan Tuhan ndahiken dahin pelayanen e, maka arus tetap itopang, idukung, itotoken. Sabab lit ka deba perpulungen e, menganggap remeh dahin si idahiken Serayan Tuhan alu dekahen mandangi/kritik yang melemahkan. Payo Paulus mengalami mbue kiniseran, tapi melala ka perpulungen si peduli dingen notoken ia, termasuk rekan-rekan sepelayanenna si saling mendukung. E maka mpebuai ertoto guna Serayan Tuhan ras perpulungen ikutlah muat bagin i bas ndahiken dahin pelayanen e.
4. Ulih latih si merdang, ende-enden si iciptakan Pt. Jakobus Barus mereken pesan, maka cukup latih Perberita si Meriah i bas manteki GBKP si malem enda. Tapi kelatihen Serayan Tuhan si arah lebe la sia-sia, GBKP seh 125 tahun semakin diberkati ras tetap berkembang guna kemulian Tuhan.