BAHAN PJJ TGl 01-07 Juli 2018

BAHAN PJJ TGl 01-07 Juli 2018

THEMA:“DONI ENDA SEH ULINA

Ogen : Masmur 104:1-24

Pdt Maria Br Sitepu

-          Penjelasan Teks

a.       Masmur 104:1-24

Adi siperdiateken bahan enda, tentuna arah judul besarna sieteh bahwa bahan enda, ngerana erkiteken puji-pujin nandangi Dibata si nggo nepa kerina tinepa ibabo doni enda, janah adi siperdiateken ka terdauhen bahan enda, emakana banci si bagi ia kubas 2 bagin besar :

1.      Ayat 1-9

Bagin enda nuriken uga kemahakuasaan Dibata nandangi kerina tinepaNa, lalit sada pe ibas doni enda si labo Dibata si ngaturkenca.

2.      Ayat 10-24

Bagin enda nuriken uga kerina tinepa si ibahan Dibata ibabo doni enda, kerina erguna nandangi sada ras sidebanna. Emakana adi siukuri alu mbages, kepeken sisadari labo lit sada pe ibabo doni enda si la erguna man tinepa sideban.

 aplikasi

Emakana rikutken tema PJJnta ibas minggu enda, si ngerana erkiteken kiniulin tinepa Dibata, tentuna sisadari bahwa kai pe si ibahan Dibata mehuli kerinana, tapi si jadi persoalan maun-maun kita me manusia selaku salah sada tinepa Dibata si erpengakap alu ukurta janah alu kepentingannta bahwa piga-piga tinepa enda labo erguna. Hal sie si perlu ipedauh kita ibas ukurta, erkiteken kai pe si lit ibabo doni enda, tentuna Dibata nggo ngaturkenca tujun ras gunana, emakana kita selaku tinepa si muliana harus beluh guna ngukuri rencana Dibata nandangi kerina sie. Ula kari erkiteken kerangapan ras sidebanna doni enda lanai mehuli bagi kai si nggo ibahan Dibata nai.