BIMBINGAN PEKAN DOA 16 MEI 2018

BIMBINGAN PEKAN DOA 16 MEI 2018

“ERTOTO KERNA GEREJA”

Kotbah : Johanes 17:20-23

Pdt Maria Br Sitepu 

-          Penjelasan Teks

a.       Johanes 17:20-23

Bagin pengogennta ibas paksa sienda eme salah sada bagin ibas pertoton Tuhan Jesus sope Ia itangkap. Adi siperdiateken benaken ayat 1 nari, maka lit 3 kali Tuhan Jesus ertoto.

1.      Man Dirina (ayat 1-5)

2.      Man ajar-ajarna (ayat 6-19)

3.      Man kalak sitek erkiteken pengajaran si ipeseh ajar-ajar (ayat 20-27)

Emakana bagin pengogennta sendah termasuk ibas bahan si peteluken ibas pertoton Tuhan Jesus.

Penungkunenna engkai maka Tuhan Jesus ertoto man kalak sitek erkiteken pengajaran si ipeseh ajar-ajar ?

1.      Tentu memang adi gelarna ertoto kita berkomunikasi ras Dibata, tapi perlu siinget bahan enda cidahken pertoton Tuhan Jesus man BapaNa, emakana pasti efek ntah pe dampakna luar biasa, hal sienda banci siidah seh ibas paksa gundari enterem kalak si nggo tek nandangi Tuhan Jesus. Janah hal sienda iakap kami perlu erkiteken ibas paksa perdalanen ajar-ajar guna mpeseh Berita Si meriah tentuna labo banci ikepkepna lalap perpulungen e, emakana tentu Kesah Si Badia si mpengasup kalak sitek nandangi Tuhan Jesus e guna tetap paguh ibas kinitekenna.

2.      Ersada ia kerina

Antisipasi siluar biasa si ilakoken Tuhan Jesus ibas perdalanen guna Erberita siMeriah, erkiteken siidah ibas piga-piga surat Rasul Paulus melala persoalen si turah labo erkiteken kalak sideban, tapi biasana si terjadi sapih-sapih kalak si nggo tek man Tuhan Jesus contohna kalak Jahudi Kristen la kalak Kristen non Yahudi. Janah hal sienda me siarapken banci pe jadi kesaksin man kerina jelma erkiteken sosok Tuhan Jesus

3.      Kemuliaan man kerina kalak sitek

Tentu kenca Jesus nangkih kusurga, iarapkenna gelah kemuliaanNa Dibata sedekah enda si lit ibas diriNa banci pe teridah ibas diri kalak sitek, gelah kerina si la pernah jumpa ras Tuhan Jesus banci nggejapken kemuliaan Tuhan Jesus arah diri kalak sitek.

-          Aplikasi

Bahan enda situhunna cidahken uga luar biasana Tuhan Jesus ibas ia sangana ngenanami kiniseran, erkiteken aminna melala perbeben la pernah Ia lupa ertoto man jelma sideban, labo terjeng iukuriNa dirina jine, hal sienda me si perlu tetap ilakoken kita selaku kalak si tek si nggo itotokenNa man Dibata. Emakana ibas pertotonnta pe ula ka kita notoken perbeben ras pemindonnta ngenca, kita perlu kita notoken kalak sideban si mungkin sangana ngenanami perbeben ibas paksa si e. Gereja pe salah sada hal si perlu jadi topic pertotonnta erkiteken adi ibas negarannta enda gundari tentuna sieteh melala sangana persoalen siidatken gereja, emakana kita perlu notokenca gerejanta aminna pe mungkin labo sada aliran ras kita gelah tetap ngasup guna tetap eksis ras cidahken keleng ate Dibata ibas kegeluhenna.