Bimbingen Khotbah Minggu 24 Januari 2016

BIMBINGEN KHOTBAH MINGGU 24 JANUARI 2016

Pdt. Larena br. Sinuhadji (Nd. Reynard Tarigan)

Invocatio : “Senina-senina, terus terang kukataken man bandu kerna nininta Raja Daud. Ia enggo mate dingen ikuburken. Kuburenna e siidah denga genduari. Ia sekalak nabi, janah ietehna padan Dibata man bana. Dibata erpadan ngangkat sekalak kesusuren Daud jadi raja bali ras ia” (Perbahanen Rasul 2:29-30)

Ogen : Nehemia 8:1-10 (Tunggal)

Khotbah : Lukas 4: 14-21 (Tunggal)

Tema : DIBATA NGGENEPI PADAN-NA! MALEM ATETA

Penjelasen Bahan Pustaka Si Badia

I bas pengogen si pemena, Esra ngogeken Kitab Undang-undang man bangsa Israel. Konteksna sanga si e, e me kenca mulih pembuangen nari, e maka pulung i Jerusalem, i tengah kesain deherken Gerbang Lau. Iogeken Esra Kitab Undang-undang. Pulung dilaki, diberu, anak-anak si enggo ngasup ngantusisa. Iogeken Esra undang-undang ndai benaken matawari pultak nari seh ciger, janah kerinana megikenca alu tutus. iterjemahkenna ras iterangken kalak Lewi Undang-undang Dibata e seh maka kerina kalak ndai ngangkasa. Kenca enggo ibegikenna kai si ikataken undang-undang ndai tangis ia kerina. Sabab enggo cukup ndekah la pernah megiken Undang-undang Tuhan. Maka Nehemia, Esra bage pe kalak Lewi ngatakenca, “Wari enda e me sada wari si badia man Tuhan Dibatandu. E maka ola kam tangis entah pe erceda ate. Mulih ku rumah ras man-manlah kam. Rasken panganndu ras anggurndu ras kalak si kekurangen. Sendah e me wari si badia man Tuhan.

I bas invocationta, konteksna e me rasul Petrus ngerana man jelma si nterem asum nusurna Kesah si Badia. Janah kai si ikataken Petrus merupaken kutipen i bas Masmur 132:11. Ertina, kai si ipadanken Dibata man Daud tuhu terealisasi i bas kerehen Yesus Kristus. Daud tek nandangi kai si ipadanken Dibata. Ia sekalak nabi janah ietehna padan Dibata man bana. “Maka arah kesusurenna nari bakal keke sekalak Raja. Raja i datas segala raja”.

I bas bahan khotbahta, ituriken ope Yesus Kristus nehken pelayanenNa, si ibenaken i Galilea nari, maka lit piga-piga proses si arus ibentasiNa, si pemena, Ia iperidiken Johanes Peridin. Si peduaken Jesus icubai Iblis i gurun pasir selama 40 wari dekahna. Ras Yesus menang i bas kerina percuban e. I bas posisi Yesus, isedariNa maka Ia ndalanken misi bas BapaNa nari guna nelamatken manusia. Ertina, padan Dibata terealisasi erkiteken ketaatan Yesus (mau berkorban). Mulihken Yesus ku Galilea, janah Ia ikuasai Kesah si Badia. Yesus ngajar ras berita kerna Yesus mbar ku belang-belang daerah e. Kerina kalak muji Ia. Tapi i bas perikop si jadi bahan renungenta, maka Yesus la ialoken, itulak kalak Nasaret, i ja i bas kuta e me Yesus mbelin-mbelin. Sanga wari Sabat reh Yesus ku Rumah Pertoton bagi biasana. Tedis Ia guna ngoge Pustaka si Badia, janah ibereken kalak man baNa kitab nabi Jesaya ras iogekenNa (7 kalak si ngoge, Iman, Lewi, ras 5 kalak jemaat biasa). Kepeken kai si iogeken Yesus merupaken nubuaten nabi Jesaya kerna Yesus jine sebage Mesias, si enggo tergenapi i bas kerehenNa. Maka kerehenNa guna meritaken Berita si Meriah man kalak musil, erberita man kalak si tertaban maka ipulahi, kalak pentang erpengidah, kalak si itindas ipulahi, janah ipebetehken maka Tuhan mulahi bangsaNa. Kenca si e ibenaken Yesus ngajar, ikatakenNa, “Sendah enggo seh isi Pustaka si Badia si ibegindu ndai”. Adi siterusken ngogesa, “Maka tuhu iakap kalak si nterem e kai si ikataken Yesus e, tapi la ia tek erkiteken itandaina Yesus maka ia anak Jusuf”. La akapna mungkin. Banci kataken penolakan kalak Nasaret man Yesus erkiteken faktor latar belakang keluarga (“Bukankah Dia anak Yusuf? Ma anak si Jusuf kin Ia? Mat. 13:55-58).

Banci kataken, aminna proses penggenapen padan Dibata e agak ndekah, tapi Dibata tetap setia nandangi padanNa, gia cukup ndekah maka terealisasi. Si ibutuhken kita e me kap kesabaren ras tek nandangi kai si ipadanken Dibata, maka terjadilah mujijat bagi ndai si enggo iogeken Yesus arah Kitab nabi Jesaya. Ras memang terbukti la bo lit sada pe tanda sengget ibahan Yesus i Nasaret (Markus 6:5-6, “I Nasaret e, Yesus la erbahan sada tanda sengget pe, seakatan pepalem piga-piga kalak sakit alu namaken tanNa ku babona. Mamang kal ate Yesus sabap la lit kiniteken kalak ndai. Je nari lawes Yesus ngajar ku kuta-kuta sekelewet Nasaret”).

Aplikasi

Dibata enggo nggenepi padanNa, malem ate. E nggo jelas. Tapi di balik Dibata enggenepi padanNa, lit i je pengorbanen, lit komitmen, kesetiaan, ketaatan Yesus Kristus maka tergenapi Dibata padanNa. Janah kita si enggo ngaloken kemalem ate, kai tanggung jawabta?

Si pemena lebe aloken Yesus sebage Tuhan ras Juruslamatta. Kita jadikan Yesus sebagai Tuhan atas hidup kita. Tek kita maka Yesus ngasup nampati kita i bas erbage-bage keadaan geluhta. Amin kai pe si terjadi kuasa Yesus ngenca siandalken.

Si peduaken, mendengar dan melakukan Firman Tuhan. Adi la kita nggit ndalanken Kata Dibata seri ertina kita menolak Tuhan Yesus (Firman telah menjadi daging). Sebage contoh, Kata Dibata ngatakenca, “Alemi salah kalak”, “Aku lang”, ninta, em ertina kita hanya beragama tapi tidak beriman kepada Yesus Kristus.

GBKP si malem enda, banci jadi salah sada gereja i bas Indoenesia si jadi sira ras tendang janah gundari enggo 125 tahun erkiteken melala kalak si nggit berkorban, subuk materi, tenaga, perasaan, waktu, pemikiran, rsd. Zending, pendeta-pendeta, pertua ras diaken terdahulu, kalak enda kerina nggit ipake Kesah si Badia seh makana tersehi padan Dibata, lawes ku kerina bangsa manusia. Liturgi Pekan Penatalayanenta mekatep ikataken, “Kekelengen Dibata e la terjeng gelah kita ngenca mejuah-juah. Kita ipilihNa jadi aronNa si isuruhNa guna ngelaken kataNa ras kekelengenNa man kerina jelma i doni enda”. Alu kata si deban, labo hanya kita saja si ermalem ate, rutang pusuhta maka kalak si deban pe malem atena erkiteken kehadirenta.

Sidalanken padanta i bas tahun 2016 enda, tahun peningkaten komitmen warga GBKP yang missioner untuk berpartisipasi dalam pelayanen. Komitmen guna ngelai segedang geluh arah waktu, tenaga, talenta, pikiren, senyum, kata-kata motivasi, ertoto, menjaga kebersihen gerejanta, ngelai Yesus alu kinilitenta, rsd.  Jadilah kita suruh-suruhen Tuhan si la perlu isuruh, tapi lit kesadaren i bas dirinta sendiri alu bersukacita, la bersungut-sungut. Sukat-sukat keberhasilen gereja labo inehen arah gedungna si mewah, melala mobil i bas ingan parkir, tapi inehen arah asakai perpulungen muat bagin i bas kerina dahin gereja. Padan Dibata tersehi erkiteken Yesus Anak Dibata si tonggal nggit berkorban, patuh man BapaNa. Iajuk kita guna nggit ipake Kesah si Badia guna membangun gerejaNa. E maka, katakenlah “I jenda aku Tuhan, suruhlah aku!”